Latest News

LADC sawrkar ruangam din

Lai Autonomous District Council (LADC) hnuaia Member of District Council (MDC) inthlan result puan zawh taka hneh taka sawrkarna siamtu MNF party chuan sawrkar ruangam an din fel ta.

LADC inthlanpui neih zawh taka MNF Party atanga thlantlin MDC te hi nimin khan Lawngtlai Circuit House-ah thukhawmin MNF General Hqrs atangin Vice President Vanlalzawma leh Adviser Lalruatkima bakah Lawngtlai East bialtu MLA, H. Biakzauva leh hruai dang thenkhat ten an telpui a. MNF Legislature Party ruangam siam fel niin, Chief Executive Member (CEM) leh House Leader-ah Lawngtlai Council Veng bial atanga thlan tlin Manghmunga Chinzah chu lungrual taka thlan a ni a, Chairman atan Paithar bial atanga thlan tlin V. Zirsanga chu thlan niin, Legislator Secretary atan Sangau West bial atanga thlan tlin K. Hrekung thlan ni bawkin, Protem Chairman atan Sekulh bial atanga thlantlin Apetow Lallawmsanga chu lungrual taka thlan a ni bawk.

He hunah hian MNF Party Vice President, Vanlalzawma chuan LADC inthlan a hnehna an chang chu lawmawm a tih thu sawiin, LADC huam chhunga politics thawnthu hi Mizoram State politics tana danglamna siamtu anih thin avangin a pawimawh em em a ni, a ti a, “MP thlanna ah LADC huamchhunga MNF Party avangin MP kan nei thei a, Village Council inthlanna neih zawh taka MNF VC tam tak kan nei thei te khan nghawng a nei thui em em a ni,” tiin tun tuma MDC inthlanna ah Lai District tana Record siamin, MDC Seat 25-ah MNF in Seat 20 an la thei chu lawmawm a tiin ropui a tih thu a sawi.

He hunah hian Lalruatkima pawhin thu sawiin hneh taka sawrkarna an siam theihna chhan chu MNF party Workers leh District Hqrs. MNF hruaitute vang a nih thu a sawi a, inthlanna felfai tak neih zawh a ni ta chu lawmawm a tih thu a sawi bawk.

Comments

Chhiar Hlawhte