Chief Minister-in Mamit District-ah hmasawnna ruhrel pasarih dinna tur lungphum a phum

Cheng vbc. 118 chuang senga Mamit District chhung Kawrthah, Tuidam leh Mamit-a infiamna leh thalaite hmasawnna ruhrel dinna tur lungphum chu nimin khan Chief Minister, Zoramthanga chuan a phum a, heng hna thawh turte hi Pradhan Mantri Jan Vikas Karyakram (PMJVK) hnuaia sum hmuh hmanga thawh tur a ni.

Heng khaw pathum-a hmalakna tur lungphum phumna hunah hian Chief Minister, Zoramthanga chuan thalaite hmasawnna tur, an hma hun a nasa taka remchanna (opportunity) siam saktu tur thil thar tha tak tak bultanna chu lawmawm a tih thu sawiin, tangkai thei ang bera hman an nih a beisei thu a sawi a. A thawktute pawhin theihtawp an chhuah a duh thu sawiin, ro tling thil, tualchhung mi mai nilo District pum tana chhenfawm tur thil a nih avangin tha taka sak a puitlin a nih theih nan thawktute chu lo enpui a, lo thawhpui turin khaw mipuite a sawm nghal a ni.

Ram in hma a sawn dawn chuan kawng tha neih a pawimawh hmasak thu Chief Minister chuan sawiin, Economy hmasawna intodelh a, inkhaichhuak tura sawrkarin ruahmanna hrang hrang a siam te a sawi a. A hlawhtlin nan kawngpui tha a tul thu te, thei leh thlai thartuten awlsam leh senso tlem thei ang bera an tharchhuahte kawngpui a thlen theihna tur Link Road tha tak siam te a pawimawh thu sawiin, khawthlang mipuite tan pawh kawng tha tak siam turin hma lak mek zel a nih thu a sawi bawk.

Sports & Youth Services Secretary, H. Lalengmawia kaihhruai heng khaw pathum-a lungphum phumna hunah hian Sports Minister, Robert Romawia Royte pawhin thu sawiin Mizoram khawthlang-ah infiamna ruhrel tha a awm ve lo chungin Sports discipline hrang hrangah Zoram leh India huap pawha lang pha thalai tam tak an chhuah tawh thu a sawi a. Heng Project hrang hrangte thawh zawh a nih hunah chuan Mizo hnam tana chhuanawm thalai tam tak khawthlang atanga an lo chhuah a rin thu a sawi bawk.

Chief Minister hian Kawrthah ah Residential Sports School (project cost cheng nuai 3286.34) leh Smart Classroom (cheng nuai 17.54) atan lungphum a phum a. Tuidam khua ah Astroturf Football Ground (cheng nuai 532.50) phah tur lungphum phum lehin hemi hnu hian Mamit-ah Residential Sports School (cheng nuai 3286.34), District Sports Complex (cheng nuai 4496.48), Community Service Centre, Sadvhav Mandab (cheng nuai 236) leh Smart Classroom Unit hnih (cheng nuai 35.08) atan lungphum a phum bawk a ni.