Mizoram-ah COVID-19 hri kai 17 hmuh belh leh

/

Niminpiah-a Mizoram-a Sample enfiah atangin COVID-19 hri kai mi 17 hmuh belh an ni a, Mizoram-a hri kai hmuhchhuah chu sang li an tling dawn hnai ta.

Niminpiah khan ZMC Laboratory-ah Sample 315 enfiah niin COVID-19 hri kai mi pakhat hmuh a ni a, District hrang hranga TrueNat Laboratory-ah Sample 253 enfiah niin hri kai 8 hmuh an ni bawk a, Rapid Antigen Test atanga Sample 718 enfiah ah hri kai 8 bawk hmuhchhuah an ni. ZMC Laboratory-a hri kai hmuhchhuah awmchhun hi Aizawl Kanan Veng mi niin hri a kaina chhui mek a ni a, TrueNat Laboratory-a hri kai hmuhchhuah zinga mi 5 te chu Chawngte-a hri kai hmuh niin Tripura atanga rawn haw an ni a, Serchhip District-ah tual-chhung-a hri inkaichhawng mi pahnih hmuh niin Lunglei-ah State pawn atanga rawn haw hri kai pakhat hmuh a ni bawk.

Rapid Antigen Test hmanga hri kai hmuhchhuah mi 8 zinga mi pathum te chu Lawngtlai District-a hri kai hmuhchhuah niin an vai hian tualchhung-a hri inkaichhawng niin an zinga pahnih te chu khawdang atanga LADC inthlanna a campaign tura kal an ni a, Lunglei District-ah hri kaina hriatloh mi pahnih hmuhchhuah niin Serchhip District-ah State pawn atanga rawn lut hri kai pakhat hmuh a ni a, Aizawl-ah damdawi In-a inentir tur hri kai pahnih hmuh niin hri an kaina chhui zui mek a ni bawk.

Nimin khan Mizoram-a COVID-19 hri kai mi 16 te chu enkawl dam leh an ni bawk a, Mizoram-ah hri kai 3994 hmuhchhuah ni tawhin an zinga 3800 te chu enkawl dam an ni tawh a, hri kai za zela 95.14 te enkawl dam ni tawhin tunah hian hri kai enkawllai 188 an la awm mek a ni.

India-ah hri kai 94.74% enkawl dam an ni tawh :

India ram-a COVID-19 hri kai hmuhchhuah zawng zawng atangin zaa 94.74 enkawl dam an ni tawh a, hri kai hmuhchhuah atanga zaa 3.81 te chu enkawl mek an la ni thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 9,22,959 enfiah niin heng atang hian COVID-19 hri kai 31,521 hmuh belh leh an ni a, heng te nen hian India ramah Sample 15,07,59,726 enfiah ni tawhin hri kai hmuh zawng zawng chu 97,67,371 an tling ta a, India ram-a Sample enfiah atanga zaa 6.47 te chuan hri an kai tawh a ni.

Darkar 24 kalta chhung khan India ramah hri kai 37,725 te chu enkawl dam niin tun thlengin hri kai 92,53,306 enkawl dam an ni tawh a, hei hi hri kai hmuhchhuah atangin zaa 94.74 niin tunah hian hri kai enkawllai 3,72,293 an la awm mek a, hei hi hri kai hmuhchhuah atangin zaa 3.81 a ni bawk. Darkar 24 kalta chhung khan India rama hri kai zingah nunna chan 412 awm lehin tun thlenga hri kai nunna chan chu 1,41,772 an tling tawh a, hei hi hri kai hmuhchhuah atangin zaa 1.45 a ni bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »