Mizoram-ah COVID-19 hri kai 12 hmuh belh leh

Niminpiah-a Mizoram-a sample enfiah atangin COVID-19 hri kai mi 12 hmuhchhuah leh an ni a, damdawi In atanga hri kai hmuhchhuah mi pali lai an awm a ni.

Niminpiah khan ZMC Laboratory-ah Sample 293 enfiah niin COVID-19 hri kai 3 hmuhchhuah an ni a, District hrang hranga Sample enfiah 217-ah hri kai 2 hmuhchhuah niin Rapid Antigen Test hmanga Sample enfiah 533 enfiah atangin hri kai mi 7 hmuh an ni bawk. ZMC Laboratory-a hri kai hmuhchhuah mi 3 te hi tunhnaia State pawn atanga rawn lut vek an ni a, TrueNat Laboratory-a hri kai hmuhchhuah mi 2 te hi Lunglei leh Kolasib District-ah mi pakhat ve ve niin State pawn atanga rawn lut ve ve an ni bawk.

Rapid Antigen Test-a hri kai hmuhchhuah 7 zinga mi 4 te hi damdawi In-a inentir tura kal niin Sihphir Venghlun-ah mi 3 leh Bawng-kawn-ah mi pakhat te an ni a, Lengpui Airport atanga rawn lut tur hri kai pakhat hmuh niin Lawngtlai-ah tualchhung-a hri inkaichhawng hri kai pahnih hmuh an ni bawk.

Nimin khan Mizoram hmun hrang hranga COVID-19 hri kai te enkawlna hmun atangin mi 63 te chu chhuahtir an ni ve leh thung a, an zingah hian hri kai tamna Lawngtlai District atangin mi 19 zet an tel a. Heti hian nimin tlai dar 5:00 thlenga Mizoram-a COVID-19 hri kai hmuh tawh chu 3881 niin an zinga 3647 chu enkawl dam ni tawhin hri kai zaa 93.97 enkawl dam an awm tawh a, hri kai enkawllai 228 an la awm a ni.

India-ah COVID-19 hri kai nuai 95 an tling ta :

Darkar 24 kalta chhungin India ramah COVID-19 hri kai 35,551 hmuh belh leh an ni a, hri kai zingah 40,726 enkawl dam an ni thung a, India rama hri kai hmuhchhuah chu nuai 95 an tling tawh a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 11,11,698 enfiah leh niin heng atang hian COVID-19 hri kai 35,551 hmuhchhuah leh an ni a, heti hian India ramah sample 14,35,57,647 enfiah ni tawhin hri kai hmuhchhuah tawh zawng zawng chu 95,34,964 an tling ta a, Sample enfiah atanga za zela 6.64 te chuan hri an kai tawh a ni.

Darkar 24 kalta chhung khan India rama hri kai 40,726 te chu anmahni enkawlna hmun atanga chhuahtir leh niin tun thlengin hri kai 89,73,373 te chu enkawl dam an ni ta a, hei hi hri kai hmuhchhuah atanga chhutin za zela 94.11 a ni a, tunah hian hri kai enkawllai 4,22,943 an la awm mek a ni. Darkar 24 kalta chhung khan India rama hri kai enkawl zingah nunna chan 526 awm lehin tun thlengin hri kai nunna chan chu 1,38,648 an tling ra a, hei hi hri kai hmuh tawh atanga chhutin zaa 1.45 a ni bawk.