Chanchin thar thenkhat :

TIPM in Chief Minister kawm

Thangram Indigenous People's Movement (TIPM) hruaitute leh MZP General Hqrs. hruaitute chuan niminpiah tlai khan Chief Minister, Zoramthanga chu a Pisa-ah kawmin kum 300 chuang Thangram hmunah hian Zohnahthlak hnam peng hrang hrang 25,000-30,000 bawr vel an chen thu leh Assam sawrkarin nasa taka an rahbeh dan te, Electoral Roll-ah pawh Assam sawrkarin an thun duhloh thu te sawiin, harsatna an tawh hrang hrangte an thlen a. Chief Minister chuan Thangram mipui ten Mizoram sawrkar hnuaia awm an duh leh Mizoram hiala beh an duh avanga Aizawl an lo thleng chu lawmawm a tih thu leh sawrkar ang pawh a thinlung taka an lo lawm thu a sawi a. Thangram mipuite'n buaina leh har-satna te, ei leh bar thlenga harsatna an tawk chu a tul anga Mizoram sawrkarin tanpui leh buaipui a inhuam thu a sawi bawk a ni.

Sports Minister in lung phum

Sports Minister, Robert Romawia Royte chuan nimin khan Chawngte Football Ground-a Astro Turf (Phullem) phah hna tanna tur lung-phum a phum a, he hunah hian Ministry of Minority Affairs atangin Field siam nan cheng nuai 532.50 sanction a nih thu leh First Instalment cheng nuai 239.62 chu Mizoram sawrkar-ah pekchhuah tawh a nih thu tarlan a ni a, He Field a phullem phah tur hi a dung meter 110 leh a vang meter 74 niin FIFA Approved Standard anih tur leh Field hungna (Fencing) leh Pavillion te pawh siamtel anih tur thu tarlan a ni. He hunah hian Sports Minister chuan Chawngte-ah Football Academy din anih tur thu leh hmasawnna hna thawh tur dang te a tarlang bawk.

Rubber Rolling Machine sem

Kolasib District chhunga Rubber chingtu chhungkaw 24 te hnenah nimin khan Land Resources, Soil & Water Conservation Department chuan Thelret sawngbawlna khawl (Rubber Rolling Machine) an semchhuak a, an District-ah hian Rubber kung nuai 2.25 vel a awm a ni.