Leng khua ah PMVDY inhrilhriatna leh PMVDY hmalakna hnuaia Khuai bawm semna hun hmang

Cooperation Department hmalakna in nimin khan Serchhip District chhunga Leng khua ah Pradhan Mantri Van Dhan Yojana (PMVDY) inhrilhriatna leh PMVDY hmalakna hnuaia Khuai bawm semna hun buatsaih a ni.

Leng Branch YMA Run-a he hun hman hi Cooperation Department-a Registrar, Lalrinsanga chuan hmanpuiin PMVDY chu ramngaw hausakna, thingtlang mite thiamna hmanga haichhuaka hlawk zawka tharchhuah tumna programme a nih thu a sawi a. Mizoram-ah he Scheme kengkawhtu chu Cooperation Department an nih dan leh an hmalak tawhna tlangpuite a tarlang a. Phase I-ah Mizoram khaw hrang hrangah Van Dhan Vikas Kendra 44 din tawh niin heng mite tan hian Fund cheng nuai 581.55 dawn tawh a ni a, tunah hian Phase II kalpui tura inbuatsaih leh mek niin hemi atan hian Central chuan cheng nuai 1725 min pawm sak tawh tih a sawi.

He hmalakna peng pakhat, Khuai khawi lamah Leng khua in nasa taka hma an la chu lawmawm a tih thu sawiin Cooperation Department-a Registrar chuan, taima taka beitute tan chuan sum tam tak thawhchhuah theihna a nih thu a sawi bawk. Hemi hnu hian Khuai khawitute hnenah Khuai bawm hlanna a nei nghal a, PMVDY hnuaia Khuai khawitu chhungkua te hnenah Khuai bawm 180 semchhuah a ni.

Nimin-a he hun hman hi Serchhip District-a Asst. Registrar of Cooperation Society (ARCS), K. Lalduhawma chuan kaihruaiin Serchhip District-a PMVDY hmalak tawhna leh ruahmanna awm mek tlangpui a tarlang a. Champhai-a Asst. Registrar of Cooperative Society, C. Vanlalhruaia leh Leng VCP. B. Vanlalfinga te pawhin he hunah hian thu an sawi bawk.