Latest News

Chanchin thar thenkhat :

Dy. CM in lungphum phum

Aizawl Zonuam-a Multipurpose Recreational Center & Community Hall sakna tur lungphum chu nimin zing khan UD&PA Department changtu Deputy Chief Minister, Tawnluia chuan a phum. Govt. Primary School Zonuam-a he hun hmanna ah hian Deputy Chief Minister chuan Vantlang in kawng hrang hranga an chhawr tangkai tlan theih tur leh hmasawnna rotling, Multipurpose Hall chu veng chhung mipuite chauh ni lovin, Veng dang te pawhin an chhawr tangkai theih ngei a beisei thu a sawi. Multipurpose Recreational Centre & Community Hall hi State Plan Fund (2018-19) atangin cheng nuai 500 senga sak tur a ni a. A building hi chhawng 4 a sak tura duan a ni.


Hmeichhe naupang ruang chhar

Nimin tlai khan Champhai bul, Khankawn leh Zotlang inkar kawng, World Bank Road-ah lirthei atanga tla ni ngeia hriat hmeichhe naupang pakhat ruang chhar a ni. Thudawn danin he ruang chhar hi Champhai Police Station hriattir-a chhui a nih hnuah Lawmsangzuali (3) D/o Neihlianthanga, Champhai Ruantlang a ni tih hriat a ni a, he hmeichhe naupang hi nimin khan a u mipa nen LPK Tipper ding laiah an chuang a, Lirthei khahtu in chhuk tura a tih hnuah thil dang a tih san leh a, lirthei a khalh chhuah leh hian hmeichhe naupang chu a la awm tih a hriat loh thu a sawi a. Hmeichhe naupang U mipa hian lirthei atanga a nau tla lai a hmuh thu a sawi thung. Nimin khan a ruang hi Postmortem nghal a ni.


I&PR Director in kawm

I&PR Director, Lallianpuii chuan nimin khan Aizawl-a Electronic Media hrang hrang hotute chu a Pisa-ah kawmin Mizoram in COVID-19 hripui leng vanga hun khirh tak a tawh mek laia Electronic Media ten tha taka sawrkar an thawh-pui avanga lawmthu a hrilh a. Electronic Media hotute pawhin mipuite rawngbawlna kawnga sawrkar hmalakna ah an inhawng hle tih sawiin, an theih ang tawk tawkin anmahni irawm chhuak pawhin hma an lo la ve thin tih an sawi a ni. He inkawmhona ah hian mipuite tana tha tura rawng-bawlna kawnga thawhhona tha an neih chhun-zawm zel theih nan leh awmze nei zawka hmalak a nih zel theih nana pawimawh chi hrang hrang an sawiho bawk a ni.


Mizo zirlai 2 te tel

International Science Fair, Expo Mexico 2020 neih mekah India ram aiawhin Mizo zirlai pahnih- R.Lalnuntluangi leh Lalhruaitluanga, St. Paul's HSS-a Class XII zirlaite an tel a, niminpiah tlai khan an Project siam te online-a present in zawhna leh chhanna hun an hmang nghal a ni. Heng Mizo zirlai pahnihte hi Science Teachers Association Mizoram (STAM)-in Samagra Shiksha nen tangkawpa an thlanchhuah an ni.


Lo vat in ruhro an chhar

North Vanlaiphai atanga Thingsai panna kawng, North Vanlaiphai atanga KM 4 vela hla kawngthlang a leipui vat ten nimin khan luruh bakah ruh then-khat an chhar a, a bulah hian bag pakhat awmin thawmhnaw leh Bible (English leh Hindi) bakah Baptisma Certificate leh thildang hrang hrangte a awm niin kan thudawnna chuan a sawi. Helai hmuna Baptisma Certificate an chhar-ah hian ‘Mahan Ganga’ tih hming chuangin Baptisma channa hmun hi Lungpuizawl Baptist Kohhran a ni a, Baptisma chantirtu hi Rev. Lalzarzova tih niin Police te chuan thil awmdan an chhui zui mek nia thudawn a ni.


HPC Party Office hawng

Hmar People's Convention (HPC) Party chuan nimin khan Sakawrdai-ah an Party Office thar, 'Sinlung Run' tia vuah chu an hawng a, HPC Party President thlan thar, Rohringa chuan an Office thar hi a hawng a ni. Kum 1994-a Mizoram sawrkar nen inremna an ziah hnuah HPC chu political party ah a inlet a, kum 2003 khan Election Commission of India (ECI)-ah Registration lo ti fel tawh a ni. Kumin Nov. 5-a HPC President thlanna neih a nih hnuah Lalbiaknunga chu Vice President ah ruat a ni a, K. Hrangkunga chu Treasurer leh JC Hmar chu General Secretary-ah ruat an ni.

Comments

Chhiar Hlawhte