Ramri-a insumdawntawnna tur Speaker in a tlawh

Assembly Speaker, Lalrinliana Sailo chuan niminpiah khan Indo-Bangladesh Border Trade Land Custom Station hmun tur Silsury khua tlawhin a hmun tur a enfiah a, Silsury khawtlang hruaitute leh Bangladesh lama Mizo unau, Mahmuam atanga lokalte nen inkawmna an nei bawk. 

Indo-Bangladesh Border Trade Land Custom Station hmun tur Silsury a tlawhna ah hian Assembly Speaker chuan Indo-Bangladesh Border Trade Land Custom Station chu Mizoram mipuite tana tangkai tak anih tur thu sawiin, kan ram mamawh chakkhai lakluh nan leh kan ram tharchhuahte hralhchhuahna atana hmun pawimawh leh tangkai tak a la nih ngei a beisei thu a sawi a. Tunah hian Bangladesh lamah Silsury atanga hlalo te ah Tourism nasa taka kalpui mek niin, Tourist hmunpuite siam a ni a. Helai hmunah hian Trade Centre kan siama, kan insum-dawntawn theih chuan Tourist tam tak kan ramah pawh kan hip theih ngei a beisei thu a sawi bawk.

He hunah hian Dampa bialtu MLA leh Govt. Deputy Chief Whip, Lalrintluanga Sailo pawhin Silsury khua leh Bangladesh inkar Khawthlang Tuipui kamah hian kan thenawm ram Bangladesh nen mumal taka insumdawntawn theihna hmun tur Border Trade Centre kan nei theihna turin Commerce and Industries Department kaltlangin sawrkar chuan a buaipui mek thu a sawi a. Pukzing atanga Silsury kalkawng pawh tithaa ti changtlung turin PWD chuan ruahmanna kalpui mek tih sawiin, he Border Trade hi hlawhtling taka kalpui anih chuan helai tlangdung mipuite'n nasa taka an chhawr tangkai tur thu leh eizawnna kawngah hmasawnna rahbi pawimawh tak a nih tur thu a sawi bawk.