LADC-a sawrkar kalpui dan Dan kalh niin sawi

Agriculture Development Board Vice Chairman, H. Biakzaua MLA chuan BJP MDC 8 ten LADC Sawrkar an kalpui reng chu Dan kalh a nih thu a sawi.

Nimin-a Aizawl Press Club-a thuthar thehdarhtute a kawmna ah H. Biakzaua chuan he thu hi sawiin, tuna LADC Term kal mek hi Nov. 26, 2015-ah inthlanna neih a nih thu leh Seat 25-ah INC in seat 16, MNF in seat 8 leh Independent in Seat 1 an lak thu a sawi a. Kumin October 16 khan CEM, T. Zakunga chuan Congress Legislature Party-te’n lungrual takin a bo bang awm lova BJP an zawm thu puangin, Oct. 23-ah Congress MDC 4 leh Nominated MDC 2-in BJP an zawm ve loh thu leh T. Zakunga kaihhruai BJP sawrkar an thlawpna an hnuhdawh thu CEM-ah an thlen ve leh thu a sawi a. Hetiang a nih takah chuan tunah hian MNF in member 12 neiin BJP in 9 leh Congress in 6 neiin Independent in member pakhat an neih thu a sawi a, Elected Member zingah Majority nei an awmloh thu a sawi a ni.