Ramri-a harsatna thleng mek chungchang sawiho; Ramri-ah Home Ministry in sipai a dah dawn

Nimin khan Chief Minister, Zoramthanga hovin sawrkar mi pawimawh ten Mizoram leh Assam inrina-a boruak muanawm a awm theihna tur leh harsatna sutkian dan tur an ngaihtuah.

Chief Minister Office Conference Hall-a thutkhawm neih ah hian Chief Minister, Zoramthanga bakah Deputy Chief Minister, Home Minister, Supply Minister, Education Minister leh I&PR Minister te bakah Chief Secretary leh Home Department-a Officer te an tel a, ramri-a harsatna awm avanga Mizoram lut tur lirthei Assam-a tangkhang mek an lo luh theihna tura hmalak dan tur sawiho a ni a. Assam State chhunga Mizoram motor leh bungraw phur tangkhang te a rang thei ang bera hruaichhuah dan tur ngaihtuah niin, hmalak dan tur an ruahman a ni bawk. Tun dinhmunah Assam State chhunga Mizo motor tangkhang leh Mizote an him thu he hunah hian tarlan niin, thlamuang taka an awm zui zel theihna tur leh an him zel theihna turin hmalak zel a nih thu tarlan a ni a. Mizoram chhunga lirthei tangkhang te pawh ei tur an nghei lohna turin hmalak zel a ni bawk.

Sawrkar laipui-a Ministry of Home Affairs chuan ramri-a buaina thleng mek avang hian Assam-ah Central Armed Police Force, SSB rawn dah tura ruahmanna siamin, Mizoram-ah hian hun reilote BSF dah tum a ni bawk a. Hei hi Mizoram sawrkar nen an cham chhunga an innghahna tur ngaihtuah tur niin, DIG Northern Range in an awmna tur ruahmanna a siampui ang.

Hetihlai hian Kolasib DC, Dr. H. Lalthlangliana chuan nimin-a amah kawmtu MJA Kolasib District hnenah BSF Company pathum chu Kolasib District-a awm turin ruahmanna a kal mek thu a sawi a, Kolasib khaw chhung hmun hnih ah leh Bilkhawthlir-ah dah an nih tur thu sawiin, CRPF-te Vairengte-ah an awm mek bawk tih a sawi a. Ramr-ia buaina avang hian nitin mamawh phurtu lirthei za chuang chu Kolasib leh Vairengte inkarah ding an awm thu sawiin, Ramri chungchanga hmalakna ah sawrkar leh pawl hrang hrangte thawhho a pawimawh thu a sawi a, “Ramri thil a harsatna kan hmachhawn mek ah hian eng pawl mah kal fal awm lova, hmalakna rual khai tak a kan kalpui a tul a ni,” a ti a, ramri buaina ah hri laka himna ngaih pawimawh a tul thu a sawi bawk.