Chhiahtlang-ah ramkal inkaphlum palh

Niminpiah tlai thimhlim khan Chhiahtlang tlangval, Lalsangzuala (30) chu a ramkalpui in Silai-a kap palhin a boral a, nimin khan a ruang hi postmortem a nih hnuah vuiliam a ni.

Thudawn danin Chhiahtlang Kawn Veng-a cheng, Lalsang-zuala S/o Zonunsanga (L) hi a thiante pahnih nen Chhiahtlang atanga Sialhau panna kawng, Vanchengte panna kawng peng atanga ke-a darkar khat vela kal ngai Mualkhang ram-ah Khuai la turin an kal a, Khuai la tura an kalna ah hian Sanghal thawm an hriat avang leh khua ala thim chianloh avanga Khuai an la lak theihloh avangin a thian pakhat hian Sanghal thawm an hriatna lamah Sa chang turin a kalsan a.

Hetianga a thianpa kalsawn hnu hian Lal-sangzuala hi lo kalsawn velehin, hetih hunlai vel hi unau hmel hai, dar 4:30 vel niin, a thianpa hian Lalsangzuala thawm hi hriain a thiante zingah ramvak ve an awm loh avangin sa emaw a ti a, amaherawh chu fimkhur thu-ah vawi engemaw zat fiah tuma a beih hnuah Sa ngei nia a hriat avangin a kap ta nia thudawn a ni.

Lalsangzuala hi a lu-ah Silai mu a lut nia thudawn niin nizan hmasa khan a ruang hi mi tlawmngai ten an la a, nimin khan Serchhip damdawi In-ah Postmortem niin chawhnu lam khan vuiliam a ni. He thil thleng hi Serchhip Police te pawh hriattir nghal niin a tul angin hma an la nghal a, nimin khan vanduaina thlenna hmunah hian kalin tihtur pawimawh ang ang te tih nghal a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn