Latest News

Vaihlo leh COVID-19

 Vaihlo leh COVID-19

- C. Lalrempuia

Social Worker

National Tobacco Control Programme

Serchhip District

Vawiin, September ni 11, 2020 hi Mizoram State Anti-Tobacco Day vawi 7-na a ni a, Mizoram hmun hrang hrangah vaihlo thatloh zia mipui ten kan lo hriat chian lehzual theihnan kumtin he ni hi hman thin a ni a, kumin atan hian thupui ah ‘Vaihlo leh Covid-19’ tih thlan a ni.

Tunlai a khawvel puma kan buaipui mek natna COVID-19 pawh mithiam zawkten theihtawp chhuahin an zirchiang chhunzawm reng a. Khawvel puma hriselna lamkawnga thawktu pawl World Health Organization (WHO) a zirmite chuan Vaihlo leh COVID-19 natna hi a inkungkaihna an puangzar tawhin mipuite hriat tur zirtirna pawimawhte pawh an lo ti chhuak tawh a ni.

Khawvel puma mithiam rualten he natna leh a kaihhnawih harsatna sukiang tura theihtawp an chhuah lai hian Dr. Adriana Blanco Marquizo, Head of Convention Secretariat, WHO Framework Convention on Tobacco Control (WHO FCTC) chuan, “Tun hmaa kan la hriat ngai loh angin COVID-19 hian Khawvel hmasawnna leh mihring nun kawng hrang hrangah hriselna pawimawh zia min hriat thar tir a ni,” a ti a. Keini pawhin kan hriselna kan ngaih pawimawh a tul zia hi a tharin i hre nawn fo ang u.

Kan hriat theuh angin Mizote hian Vaihlo zuk leh hmuam kan hmang nasa em em a. Global Adult Tobacco Survey (GATS) 2016- 2017 zirchianna atanga a lan danin Mizo mipui 58.7% vel hian vaihlo zuk leh hmuam eng chi emaw ber an hmang mek a ni. Heng zingah hian Meizial zu thin tam berin 25.1% in zuk chi an zuk laiin 24.3% te chuan hmuam/ei chi an ti a, 9.2% te chuan zuk chi leh hmuam chi an ti kawp bawk. 

Meizial zuk hi Chuap tan a thatloh bakah thawkna lam a harsatna min thlen theitu langsar tak a nih avangin meizu mi te chu COVID-19 lakah an him lo zawk tiin a sawi theih ang. Zirchianna atanga a lan danin COVID-19 hi meizial ang bawk a kan thawkna dawt tan a natna hlauhawm tak mai a nih avangin mei zuk nen chuan thil inhmeh lo tak a ni.

Zuk leh hmuam hi mihring taksa hriselna tichhe thei tu mai ni lovin COVID-19 kaina chance sang tak min siam theitu a ni a, Zuk leh hmuam kan hman hian kan kut zungtang leh kan hmui a insik fo avangin kan Ka chhungah natna hri luh palh theihna remchang a tam thin hle. Tin, Meizu mi te hi Chuap lam thatlohna nei an nih thin avangin natna hlauawm zawk an vei awlsam bik hle bawk.

He natna hrileng, COVID-19 atang hian mi tin ten taksa hrisel tha, Chuap leh Lung hrisel tha kan mamawh zia a lang a. Tun hi zuk leh hmuam kan sim nana hun tha tak a ni tih hre thar ila. Nang leh in chhungkua in lo hrisel zawk theih nan vaihlo (zuk leh hmuam) hi lo bansan ngei la, nangmah mai a bansan har I ti a nih chuan Tobacco Cessation Clinic (TCC), District Hospital Serchhip-ah OPD hun chhungin an lo tanpui thei reng che a ni.

Comments

Popular News (Last 30 Days)