Nikhat-ah hri kai za chuang hmuhchhuah an ni

Niminpiah khan Mizoram-ah COVID-19 hri kai 141 zet hmuh belh leh an ni a, Mizoram-a nikhat-a hri kai hmuchhuah tam ber ni leh nikhat-a hri kai za aia tam hmuhchhuah a nih vawikhatna a ni bawk.

Sawrkar thuchhuah tarlan danin niminpiah-a Mizoram-a hri kai hmuhchhuah zinga 138 te hi ZMC Laboratory atanga hmuh niin midang pathum hi Rapid Antigen Test hmanga Kolasib District-a hri kai hmuh an ni thung. ZMC Laboratory-a hri kai hmuhchhuah 138 zingah hian Aizawl khawpui Veng hrang hrang 235 atangin mi 94 te chuan hri an kai tih hmuhchhuah a ni a, Tuivamit atanga hri kai hmuhchhuah tam berin mi 17 hmuhchhuah an ni a, Bawngkawn atangin mi 14 hmuh an nih bakah Chaltlang atangin mi 7 leh Chanmari West, Bethlehem Vengthlang leh Salem Veng atangin mi 5 theuh hmuh an ni a, Veng dang atangin tlem tlem hmuh an ni bawk.

Heng bakah hian Quarantine Facility hrang hranga awm te atangin hri kai 42 hmuhchhuah an ni bawk a, State pawn atanga rawn haw Ramthar Veng leh Champhai Kanan Veng atangin hri kai pakhat ve ve hmuhchhuah an ni bawk. Niminpiah-a Rapid Antigen Test hmanga hri kai hmuhchhuah Kolasib District-a mi pathum te hi hnamdang lirthei khalhtute vek an ni thung.

India ramah COVID-19 hri kai nuai 44 tling tawh :

India rama COVID-19 hri kai hmuhchhuah chu nuai 44 an chuang ta. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 11,29,756 enfiah leh niin heng atang hian hri kai 95,735 hmuh leh an ni a, heng te nen hian India rama sample enfiah zawng zawng chu 5,29,34,433 tling tawhin hri kai hmuhchhuah zawng zawng chu 44,65,863 an tling tawh a ni.

Hetihlai hian India rama hri kai zingah enkawl dam an awm belh zel a, darkar 24 kalta chhung khan hri kai 72,939 te chu enkawl dam niin tun thlengin hri kai 34,71,783 te chu enkawl dam an ni tawh a, hri kai hmuhchhuah atangin enkawl dam hi zaa 77.74 an tling tawh a, tunah hian hri kai enkawllai 9,19,018 an la awm mek bawk a ni. Darkar 24 kalta chhung khan India ramah hri kai nunna chan 1,172 awm lehin hri kai zinga nunna chan pawh 75,062 an tling tawh bawk a ni.

Comments

Chhiar Hlawhte