Chanchin thar thenkhat :

Hri leng mek thlirhona nei

Niminpiah-a Mizoram-a COVID-19 hri kai hmuhchhuah an tam avanga hmalak dan tur ngaih-tuahin nimin khan Health Minister, Dr. R. Lal-thangliana leh Home Minister, Lalchamliana bakah sawrkar hotu pawimawh te chu SAD Conference Hall-ah an thukhawm a, he hunah hian hri leng avanga inkharkhip chungchangah thutlukna siam lovin Ministry of Home Affairs rawn a ni dawn nia thudawn a ni. He hunah hian COVID-19 positive te enkawlna tur Covid Care Centre (CCC) dinhmun tarlan niin tun dinhmunah Civil mi COVID-19 positive 1737 enkawl theihna tur CCC neih a ni a, Paramilitary Forces COVID-19 positive 303 enkawl theihna tur CCC 6 a awm a ni. COVID-19 a darh nasat avangin dinhmun der-thawnga awm sa (vulnerable group) te, a bikin kum upa te, natna benvawn neite leh naupangte dinhmun ngaihtuah a pawimawh hle tih tarlan a ni bawk a, chhungtinte tangrualin a theih ang anga an fimkhur a pawimawh takzet thu tarlan a ni.

SMAF hnuaiah thlai tiak sem

Lunglei District Agriculture Department hnuaia Sub-Mission on Agro Forestry buatsaihin thlai tiak semchhuahna chu nimin khan Lunglei-a Agriculture Complex-ah neih a ni a. Lunglei District Agriculture Office hnuaiah hian SMAF hmalak-na in Nghasih ramah thlai tiak 50,000 leh Chhum-khum-ah thlai tiak 25,000 enkawl a ni a, heng hmun atangte hian loneitute tan thlai tiak hi sem chhuah a ni. Heng hmunahte hian thlai chi hrang hrang 19 kuitiah niin nimin khan thlai tiak chi 6 Archangkawm, Khanghu, Japan Zawngtah, Phui-hnam leh Tengtere bakah Zawngtah tiak te semchhuah a ni.

Hri kai 1333 tling tawh

COVID-19 hri leng avangin nimin thleng khan Mizoram-ah mi 46,638 te Sample enfiah ni tawhin heng atang hian hri kai 1333 hmuh an ni tawh a, mi 750 te chu enkawl dam ni tawhin hri kai enkawllai 583 an la awm mek a, nimin khan enkawl dam erawh an awmlo thung.

Laboratory 3 hmang tan

Mizoram sawrkar in District Hospital tinah TrueNat Laboratory din a tumna kawnga hma-lakna kal zelah nimin khan Serchhip bakah Saitual leh Siaha-ah te TrueNat Laboratory hman tan a ni a, TrueNat Laboratory-ah te hian TrueNat Quattro RT-PCR (Mini RT-PCR) khawl bun niin Siaha-ah hian nimin khan Sample 4 enfiah niin Saitual-ah Sample 5 enfiah a ni bawk a, Serchhip ah pawh Sample 9 enfiah niin District tina khawl bun te chu hman theih vek a ni dawn hnai ta a ni.