Task Force hri kai a thlawnin enkawl dawn; Community transmission la thleng lo ah ngaih a ni

Mizoram sawrkar-a Health Secretary, H. Lalengmawia chuan COVID-19 hri leng mekah Task Force te chu hri an kai a nih chuan a thlawnin sawrkarin enkawlna a pe dawn tih a sawi a, Aizawl Municipal huamchhunga Lockdown kalpui chhungin Sample a tam thei ang ber enfiah tum a nih thu a sawi bawk.

Thuthar thehdarhtu thenkhat ten an kawmna ah Health Secretary, H. Lalengmawia chuan Task Force te chu hri an kai a nih chuan a thlawnin sawrkarin enkawlna a pe dawn tih sawiin, LLTF leh VLTF te hi mi tlem te an ni a, vanduaithlak taka hri an kai a nih chuan a thlawnin enkawl an ni dawn a. An hnuaia mite erawh chu an case azirin ngaihtuah an ni dawn a, an bialtu DC emaw, CMO emaw ten an chanchin an zirchiang ang a, chuta tang chuan sawrkarin thu tlukna a siam dawn tih a sawi a. An vaia a thlawna enkawl chu a hautak dawn tih pawh sawiin, sawrkar tan phurh zawh loh a awm thei dawn niin a sawi a, COVID-19 enkawlna atana mi inpe (volunteer) te chu August thla atangin sawrkarin lawmman ‘honorarium’ pek a tum tawh tih a sawi bawk.

Aizawl Municipal huamchhunga tun thla ni 17 thleng awh tur Partial Lockdown neih chhungin COVID-19 vei leh vei lo endikin Sample Test a tam thei ang ber neih an tum tih pawh sawiin, “Test-na hmanrua pawh nei daih turah kan inngai a, theihtawp chhuah kan tum a ni,” a ti a. COVID-19 vei tam viau mahse vantlang-ah chuan a la darh chiah lo nia a hriat thu sawiin, “Community transmission hi la thleng chiahlo ah kan inngai a, hetihlai hian Local Transmission erawh a thlengah a ngaih theih a. Mi thenkhat ten Community Transmission a thleng nia an sawi pawhin kan hnial lem lo a ni,” a ti bawk.

COVID-19 hri kai hmuhchhuah a tam zel avang leh sawrkar laipuiin December, 2020-ah chuan Mizoram-a hri kai chu mi 5,000 an tling thei nia an sawi avangin hri kaite enkawlna (dahhranna) hmun chungchangah harsatna an nei thei nia sawiin Health Secretary chuan, “COVID hri kaite enkawlna tur chungchangah hmunhma indaihloh palh kan hlau hle a, CCC tur hi kan zawng zel a. Tun dinhmunah chuan kan la buai hrih lo a, la buai thei kan nih avangin sawrkar chuan ngaihtuahna a hmang zel a. Durtlang-a BSUP hmun pawh enfiah kan tum a, helai hmun hi hman theih a nih chuan mi 1000 dawn an leng thei turah kan ngai a ni,” a ti bawk.