Chanchin thar thenkhat :

AMC-ah Lockdown puang

Tunhnaia COVID-19 hripui vei hmuhchhuah thar an pun avangin hripui darh zel tur venna atan nizan hmasa zanlai atanga September 17 (Ningani) zanlai dar 12:00 thleng Aizawl Municipal Corporation (AMC) huamchhungah Partial Lockdown puan a ni a, hemi atan hian mipui kaihhruaina pawh tihchhuah nghal niin phalna neilo tan Aizawl-a luh leh chhuah phal a ni lova, sumdawnna hmun-a nitin mamawh (Essential commodities) zawrhna dawrte chu Deputy Commissioner leh LLTF te ruahmanna siam angin hawn theih a ni ang. Sakhaw biakna hmunah te mipui punkhawmna tur inkhawm pangngai neih phal a ni lova, Biak In-a zing tawngtai inkhawm ah erawh mi 50 aia tamlo inkhawm phal a ni a. Mitthi vuina, lungphun, inneihna, anniversary, pawl thila kalkhawmna, Book release, leh a dangte ah chuan mi 50 aia tam punkhawm khap a ni bawk.

ICAR in bungrua semchhuak

Indian Council of Agricultural Research (ICAR) Research Complex For NEH Region, Mizoram Centre, Kolasib bultumin nimin khan Tribal Sub Plan hnuaiah 'Promotion of Farm Mechanization for Increasing Net System Productivity and Cropping Intensity in Mizoram' hun hman a ni a, he hunah hian Phaisen Kanan Group, WRC Farmer Association, Lawngtlai leh Chuailo FIG, Saiphai hnenah Power Tiller, Water Pump set leh Pipe hlan an ni a, Serchhip Agriculture and Horticulture Farming Cooperative Society leh Buk-vannei a loneitu thlanchhuah pahnihte hnenah Water Pump set leh Pipe hlan a ni bawk.

Ramhlun South LC inthlang

Aizawl Ramhlun South Local Council in-thlanna chu niminpiah khan tluang taka neih zawh a ni a, he Local Council-ah hian Seat 7 awmin Vote nei 4588 zingah mi 2917 ten Vote thlakin Vote zaa 63.58 a tla a ni. He inthlanna ah hian General Seat 5 awm ah MNF in Seat 4 lain Congress Party in Seat khat an la a, ZPM chuan Reserved Seat awmchhuan an la thung a ni.

District Hospital tan hlan

SSA leh RMSA chhunkhawmna, Samagra-a thawk te intelkhawmna, Federation of Mizoram Samagra Employee (FEMSE) Member ten COVID-19 dona atana sum an thawhkhawm atanga bungrua an lei te chu nimin khan Saitual District Hospital-ah an hlan a, heng bungrua te hi Rs. 1,88,500/- hu zet niin heng zingah hian Ha lam enkawlna hmanrua thahnem tak a tel a, heng bungrua dawngtu, Dr. V. Lalhmachhuana chuan a hmaa Ha phawi chauh an tih theih thin chu tunah chuan hmunpui pan ngai lova an enkawl theih tawh dawn thu a sawi bawk.

MRP aia to-a zawrh man

Tunkar Thawhtanni atanga Ningani thleng khan Champhai-a Legal Metrology Enforcement Staff leh Consumer Union te chuan Champhai khawpui chhunga Motor Parts zuar dawr hrang hrang 17 atangin an bungrua zawrh zinga MRP thaichhiat leh MRP aia to a hralh thahnem tak an man a, hemi hmalam hian dawrkaite hnenah an bungrua te Maximum Retail Price aia to a hralh lo tura hriattirna an lo pe tawh a ni. Heng Dan bawhchhia te hi dan anga an chungah hremna lek a ni bawk.