Serchhip District Hospital sakna atan Bukpui leh Chhiahtlang inkar ram ruahman a ni

Serchhip District NGO Coordination Committee huaihawta tlawmngai pawl hrang hrang leh Serchhip Town chhunga Village Council President te thukhawm chuan Serchhip District Hospital sakna atan Bukpui-a P&E Department ram leh ITI Building tur sak mek inkar chu tha tiin helai hmunah hian District Hospital sak a nih theih nan hmalak nise an ti.

Tunhnaiah Serchhip District Bawrhsap hova Rogi Kalyan Samiti (RKS) Governing Body thukhawm in Serchhip District Hospital Building thar sakna tur chungchangah Serchhip District NGO Coordination Committee te rawtna thlen tura a tih angin nimin chawhnu khan Serchhip District NGO Coordination Committee huaihawtin Serchhip Town chhunga VC tin VCP leh NGO hrang hrang aiawhte chuan Serchhip Sub-Hqrs. YMA Conference Hall-ah Joint Meeting neiin hemi chungchang hi an sawiho a. He hun kaihruaitu Serchhip District NGO Coordination Committee Chairman, R. Sanghmingthanga chuan Serchhip in damdawi In kan neih mek chu kum 1962 a sak leh kum 1963 a luah nia hriat a nih thu sawiin, tunah chuan tih changtlun zel niin thawktu pawh mi 200 chuang an awm tawh thu a sawi a. Thawktu pawh tha tak tak neiin khum 40 awm theihna niin khum 10 awmna TRAUMA Center dah belh a nih thu a sawi bawk.

NGO Coordination Committee Chairman chuan District Hospital hmun tur chungchanga NGO Coordination Committee hma lo lak tawhna te sawiin, District Hospital sakna tura lungphum phum a nih hnuah Lawibual ramah dah turin ram neitute biaa agreement te pawh an lo ziah tawh thu a sawi a. Amaherawh chu sawrkar Department lamah beisei anga hlawhtlinna an hmuhloh thu leh chhanna beidawnthlak tak tak te an hmuh thu a sawi a. Ministry thar a lo din hnuah pawh NGO Coordination Committee chuan hma la zuiin bialtu MLA hnenah pawh thlena ngaihchan a nih laiin tun thla ni 14-a District Bawrhsap hova RKS Governing Body thukhawm chuan District Hospital hmun atan hian thutlukna siam tura a rawn tih leh anga he thutkhawm hi koh a nih thu a sawi bawk.

Hemi hnu hian he thutkhawm a tel te hian District Hospital sakna tur atana tha nia an hriat hrang hrangte sawihoin hun lo kal zel tur thlir chungin Serchhip leh Chhiahtlang inkar, Bukpui-a P&E Department leh ITI Building tur sak mek inkar chu District Hospital sakna atan hian tha an ti tlang a, helai hmun hi Chhiahtlang North VC te chuan ram awl a nih thu leh zangnadawmna pek ngailo tur a nih thu sawiin, chhuah lamah NH. 54 a awm bakah tlak lamah pawh kawngpui a kal sa vek thu an sawi bawk a, he huna tel te chuan helai hmun hi lungrual takin an pawm a ni.