Serchhip District Hospital-a TrueNat Laboratory chu hman theih tura hawn a ni ta

Serchhip District Hospital OPD Building-a TrueNat Laboratory siam thar chu nimin chawhnu khan District Bawrhsap, Kumar Abhishek IAS chuan hawngin nimin vek khan Sample 9 te chu enfiah nghal a ni.

Serchhip District Hospital-a TrueNat Laboratory hawnna hunah hian Bawrhsap chuan kan District in kan mamawh em em, COVID-19 dona kawnga hmasawnna nasa tak min thlen theitu tur khawl hman theiha a awm ta chu lawmawm a tih thu sawiin, “Hmasawnna lian tak a ni,” a ti a. ZMC-a Sample inthawn hian hun a duh rei a, Sample phurh thlakna ah sum leh pai sen a tul bawk a, chung thilte chu he khawl vang hian a lo nep deuh thei dawn a. Hei bakah hian hmanhmawha contact tracing tih leh Sample Test zung zung a tul hunah pawh a tangkai hle dawn a ni, a ti.

Serchhip-a TrueNat Laboratory-ah hian TrueNat Quattro RT-PCR (Mini RT-PCR) khawl bun niin helai hmuna thawktu turte chuan Bawrhsap hi khawl hnathawh dan tur an hrilhfiah nghal a, helai hmunah hian RNA Extractor pahnih awmin tum khatah Sample pahnih endik theih niin khawl pahnih hmang hian Sample 4 enfiah theih a nih dawn thu leh result hre turin darkar khat leh a chanve vel hun a mamawh thu te, nikhat-ah sample 16 vel en theih an in beisei thu te an hrilh a. Serchhip TrueNat Laboratory enkawltu tur bik trained Technician pahnih awmin Doctor leh Data Entry Operator te an awm dawn bawk a ni.

Nimin a he khawl hman theiha hawnna hunah hian Serchhip CMO, Dr. Laldawngliana Sailo leh District Medical Superintendent, Dr. ZD. Lalmuanawma bakah damdawi In a thawktu pawimawh dangte an tel a. He khawl hi ICMR pawhin a pawmpui tawh niin nimin vek khan Positive Contact leh Quarantine Centre-a awm te Sample 9 chu enfiah nghal a ni bawk.

COVID-19 hri leng mekah Serchhip-a Swab Sample enfiahna tur khawl, TrueNat Quattro RT-PCR bun tur hian sawrkar chuan hma lain Serchhip District Hospital-a bun tur hi August 13, 2020 khan Serchhip rawn phurh thlen a ni a, khawl bunna atan hian District Hospital in Laboratory a neih mek chu hman theih a nih loh avangin OPD Building hnuaia Room thenkhat chu siamremin Laboratory hi siam thar a ni a, Laboratory building hi peihfel a nih hnuah khawl rawn buntu tur Company lam mithiam ten khawl hi rawn bunin August 26, 2020 khan Mizoram sawrkar aiawh ten an rawn enfiah leh a, September ni 1, 2020 khan ICMR chuan hman phalna a rawn pe tawh bawk a ni.

Comments

Chhiar Hlawhte