BSF hri kai vangin mi 8 inkhunghrang turin ti

Serchhip Nursing School CCC-a dah tur BSF Sipai COVID-19 hri kai te chu nizan hmasa khan Serchhip khawchhungah chawlhpui an nih avangin Serchhip-a mi 8 te chu mahni In lama inkhunghrang rih tura tih an ni.

Thudawn danin tunhnaia BSF Sipai zinga hri kai hmuhchhuah mi 48 te chu niminpiah khan Serchhip Nursing School CCC-a dah turin Motor lian pahnih hmanga rawn phurh an ni a, nizan hmasa dar 9:00 hnulam khan Serchhip khua hi rawn thlengin Serchhip Sailiamkawn-a Waiting Shed-ah heng mite hi an chawl nia hriat a nih bakah helai vel-a awm te pawhin BSF Sipai teikual vel chu an hmu bawk a ni.

Hetianga BSF sipai hri kai te helai hmuna an chawlh hrelo hian nimin zing khan Serchhip Darnam Veng leh Sailiamkawn-a feh kal tur mi engemaw zat chu helai hmunah hian an chawlh avang leh helai hmuna BSF Sipai lo chawl te hi COVID-19 hri kai an ni tih hriat a nih tak bawk si avangin Darnam Veng VLTF te chuan helai hmuna feh kal tur lo chawl te hi chhui zui hna thawk nghalin hriat theih chinah nimin tlai thleng khan mi 8 te chu mahni In lamah ni 14 chhung lo inkhunghrang tura tih an ni a, an chhui zinga tello, nizan hmasa zanrei leh nimin chawhma lama helai hmuna lo chawl te pawh mahni lo inkhunghrang turin an chah bawk a ni.

Helai hmuna lo chawl ve te hi inkhunghran hun tawp dawnah an Sample lak tur a ni dawn a, helai leh a chhehvel hi nimin vek khan Fire Department chuan damdawi nen an kap thianghlim nghal bawk a ni.