Serchhip tana PHE Booster Pump siam belh dan tur thlir

Serchhip khawpui chawmna tura PHE Department in IOC Veng-a Booster Pump an hman mek chu nimin khan Mizoram PHE Department hotute chuan tlawhin a tih changtlun dan tur an thlirho.

Nimin-a Serchhip-a rawn kal PHE Department-a Engineer-in-Chief Er. Lalmuanzova leh Chief Engineer, C. Lalremsiama bakah Department hotute hian nimin chhun khan Serchhip IOC Veng-a PHE Booster Pump hi tlawhin PHE Serchhip WATSAN Division-a SDO, Er. Samuel L. Ralte chuan helai hmun atanga Ser-chhip khawpui Bazar lam area tui an pekchhawn dan a hrilhfiah a ni.

PHE Department hian Tuikum lui atanga Tui an pump chhuah chu Khawtetlang-a Main Reservoir-ah lalutin hemi atang hian New Ser-chhip Area leh Chhiahtlang area te chu Gravity hmanga pek a ni a, Serchhip Bazar Area lam pekna atan hian IOC Veng-ah hian Booster Pump hmanga pump leh niin hei hian Serchhip khawpui chhung zatve aia tam a chawm avangin a chhiat palh a harsatna awm thei te he hunah hian sawiho a ni a, PHE Department hotu lian te chuan Booster Pump chu tihlen tul an tih thu sawiin, a hmunhma in a zo a nih chuan khawl dang dah belhin line pahnih hmanga Serchhip Bazar lam area hi tui pump tul an tih thu an sawi a, hemi atan hian Project siamin sum awm thei turte dap nise an ti bawk.

Serchhip PHE Department hotute chuan tuna Serchhip khawpui chawmna atana Tui pump khawl chu a tirah nitin tui litre maktaduai 1.84 pump thei tura duan a nih thu sawiin, tunah hian Serchhip khua in tui a mamawh chu nitin litre maktaduai 2.65 vel a nih thu an sawi a. Tuna Tui pump khawl chuan nitin tui litre maktaduai 2.4 vel a pump thu leh a bak hi Gravity hmanga tui an lak atanga hmuh a nih thu a sawi a, Serchhip khua in Tui kan pump theih hi pung lo mah se mamawh erawh a sang tial tial tih a sawi bawk.