Serchhip-ah PHE Store-cum-Chemical House leh EMRS Tui pump-na tur khawl hawn a ni

PHE Department-a Engineer-in-Chief, Er. Lalmuanzova chuan nimin khan Serchhip-a PHE Complex-a Store-cum-Chemical House chu a hawng a, Eklavya Model Residential School tana tui Pump-na khawl chu PHE Chief Engineer Zone-I, Er. C. Lalremsiama chuan a hawng bawk.

PHE Serchhip WATSAN Division in an sak Store-cum-Chemical House building hawnna hi PHE Serchhip WATSAN Division-a Sr. Executive Engineer, Er. F. Lalsanglura chuan kaihruaiin building hawngtu, Er. Lalmuanzova chuan mi thenkhatin hnathawhna tur sum tam tak hmanga hna chhe taka an thawh lai leh sum ruahman sa in a daihloh thin laia PHE Serchhip Division-in a hranpaa sum sanction pawh awm lova Building tha tak an sa thei chu lawmawm a tih thu a sawi a. PHE Department-ah hian kum 1986 atanga a lo thawh tawh thu sawiin, tunah Secretary-a kaisang thei dinhmuna a ding ta hial chu lawmawm a tih thu a sawi a, PHE Engineer-in-Chief a nih laia PHE Department thawktute thawhhona chu tha a tih thu sawiin, hei hian PHE Department-ah rah tha tak a chhuah tih a sawi bawk.

Nimin a hawn tak Store-cum-Chemical House hi kawng an-ah chhawng hnih niin he building zawm tur hian kawngpui hnuailam ah Store hi sak leh a ni a, PHE Department bungrua rit leh lian deuh lo thleng te pawh awlsam zawka hlanthlak zung zung theih tawh tura ruahman a ni.

Hemi hnu nimin chawhnu lam khan PHE Department in Serchhip Kawlri Tlang-a Eklavya Model Residential School tana Tui Pump-na tur an siam chu PHE Chief Engineer Zone-I, Er. C. Lalremsiama chuan hawngin hetianga tui pump-na an siam hi zirlaite leh thawktute bakah Serchhip mipuite tan pawh a tangkai a beisei thu a sawi bawk.

He hunah hian Sectional Officer, PC. Lianrengpuii chuan he khawl an bun dan leh hna an thawh dan te sawiin, he tui lakna ah hian EMRS in Tuizem lian 2 an neih chu hman nghal niin Hospital Section Site Office-ah khawl bun a ni a, he hna hi cheng nuai 64 senga thawh niin nikum Feb. 9-ah hna tan a ni a, December 5-ah hna hi zawhfel a ni bawk.

Comments

Chhiar Hlawhte