Chanchin thar thenkhat :

District 3-ah TrueNat hmang

Mizoram sawrkar in Mizoram District Hospital tina TrueNAT Quattro PCR (Mini PCR) bun tura hma a lakna tih hlawhtlinna atan nimin khan Kolasib, Siaha leh Hnahthial District Hospital-a TrueNat Quattro PCR khawl bun te chu hawngin hman tan a ni a, hemi hmalam hian Lawngtlai District Hospital-a khawl bun chu hman tan a lo ni tawh bawk a ni. TrueNAT Quattro PCR (Mini PCR) Bio-Safety Level-2 Laboratory hi Hnahthial-ah chuan District Bawrhsap, Vanlalmawia chuan hawngin Kolasib-ah chuan Supply Minister, K. Lalrinliana chuan a hawng a, Hnahthial-ah hian Sample 6 enfiah niin Siaha-ah hian Sample 4 enfiah nghal a ni a, Vawiin ah Serchhip leh Saitual ami te hmantan tum a ni.

Coaching Centre hawng

Mizoram Youth Commission Chairman, Dr. Vanlaltanpuia MLA chuan nimin khan Lunglei Chanmari-ah MYC Coaching Centre thar a hawng a, MYC Coaching Centre thar ah hian MYC hnuaia Coaching Program hrang hrang kal mek bakah Program thar pathum – Offline IAS Coaching, State Combined Civil Service Coaching leh MPSC hna lak bak zawng la tu tur MSSSB Coaching te a awm a ni.

Mipui ten Vote thlak dawn

Mizoram State Election Commission in rua-hmanna a siam angin Ramhlun South Local Council inthlanna chu Vawiin hian neih a ni dawn a, Ramhlun South Local Council-ah hian August 27 khan inthlanna hi neih tura tih loh ni tawh mah se hri leng avanga neih theih a ni ta lova, Vawiin hian mipui ten Vote thlakin inthlanna a Vote tla te hi chhiar nghal tur a ni ang.

CM hnenah PPE hlan

ZOHANDCO, UNDP leh EXIM Bank of India tangkawpin training an buatsaih atanga tualchhung puantahtu ten an siamchhuah PPE kit 25 chu nimin khan Chief Minister, Zoramthanga hnenah an hlan a, heng te hi COVID-19 frontliner te hman atan a him tawk tih finfiah tawh a ni.