September 4-ah inthlanna neih theih beisei

Hripui leng avanga August 27, 2020-a Village Council leh Local Council inthlanna neih theih taklohna ah te tun thla ni 4 khian inthlanna neih tura ruahman a ni.

Mizoram State Election Commission chuan niminpiah khan Mizoram sawrkar-a Health Secretary hnenah lehkha thawnin, Village Council leh Local Council dinglai term chu September ni 7, 2020 hian a tawp dawn tak avangin August ni 27 a COVID-19 vanga inthlang ve thei ta lo Local Council 24 leh Village Council 8 te inthlan hun atan September ni 4, 2020 (Zirtawpni) a tinzawn tih a hrilh a. Heng khua leh Veng te dinhmun dik tak a rang lama hriat chian a nih theih nan sample lakkhawm leh Test tulte ngaih pawimawh hmasaka nei turin a ngen a ni.

Mizoram District 9-a VC inthlanna neih tura inthlang ve thei ta lo VC 8 te hi Sawleng, Darlawn Chhim Veng, Darlawn Venghlun, Darlawn Vengpui, Melriat, Hualngohmun, Kelsih leh Muallungthu Village Council te an ni a. Local Council inthlang thei ta lo ta hi Chaltlang Lily Veng, Ramhlun South, Venghnuai, Bungkawn, College Veng, Republic Vengthlang, ITI Veng, Bawngkawn, Thuampui, Bungkawn Vengthar, Nursery Veng, Khatla, Ramhlun North, Ramhlun Vengthar, Ramhlun Sports Complex, Durtlang, Durtlang North, Maubawk, Bawngkawn South, Dawrpui Vengthar, Mission Veng, Khatla South, Mission Vengthlang leh Lawipu Local Council te an ni.