Hri kai 1 hmuh leh a ni

Niminpiah khan Mizoram-ah COVID-19 hri kai mi pakhat hmuhchhuah leh niin Mizoram-a hri kai hmuhchhuah chu mi 1012 an tling tawh.

Niminpiah-a Mizoram-a COVID-19 hri kai hmuh-chhuah awmchhun hi Rapid Antigen Test hmanga Kolasib District-a hri kai hmuhchhuah a ni a, amah hi kum 20-a upa niin Assam ami a ni a, COVID-19 hri kai lanchhuahna neilo a ni. Nimin-piah vek khan ZMC Laboratory-ah Sample 862 enfiah niin hri kai hmuhchhuah an awm lova, Lunglei TrueNAT Laboratory-ah Sample 24 enfiah niin hri kai hmuhchhuah an awmlo bawk a ni. Nimin khan Mizoram-ah hri kai enkawl dam mi 21 awmin heti hian Mizoram-ah hri kai hmuhchhuah 1012 awm tawhin mi 610 enkawl dam an ni tawh a, enkawllai 402 an awm bawk.

Darkar 24 chhungin COVID-19 kai 69,921 hmu leh :

Darkar 24 kalta chhung khan India ramah COVID-19 hri kai mi 69,921 hmuhchhuah leh niin mi 65,081 enkawl dam an ni bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 10,16,920 enfiah leh niin hri kai 69,921 hmuh leh an ni a, heti hian India ramah mi 4,33,24,834 te sample enfiah ni tawhin hri kai hmuhchhuah zawng zawng chu 36,91,166 an tling tawh a, India rama Sample enfiah atangin zaa 8.52 te chuan hri an kai tawh a ni. India rama hri kai hmuhchhuah zingah hian mi 28,39,882 te chu enkawl dam niin zaa 76.94 enkawl dam an ni tawh a, tunah hian hri kai enkawllai 7,85,996 awmin nunna chan mi 65,288 an awm tawh bawk.