Mizoram-ah hri kai 20 hmuh belh leh an ni

Darkar 24 kalta chhung khan Mizoram-ah COVID-19 hri kai mi 20 hmuhchhuah leh niin Mizoram-a hri kai hmuhchhuah zawng zawng chu 1353 an tling tawh.

Sawrkar thuchhuah tarlan danin niminpiah khan ZMC Laboratory-a Sample enfiah zingah COVID-19 hri kai 16 hmuhchhuah niin Lunglei-a Truenat khawl-ah hri kai pakhat hmuh a ni bawk a, Rapid Antigen Test hmangin hri kai mi pathum hmuh an ni bawk.

ZMC Laboratory atanga hri kai hmuhchhuah thar mi 16 zinga mi 10 te hi Aizawl khawpui chhung Veng 8 leh Darlawn khuaa hri kai lo hmuhchhuah tawh te atanga hri kaichhawng an ni a, an zingah hian nausen thla 6 mi pawh a tel bawk. Heng baka ZMC Laboratory atanga hri kai hmuhchhuah te hi Falkawn-a mi 5 leh ITI Veng-a mi pakhat an ni thung.

Lunglei TrueNat khawl-a hri kai hmuhchhuah hi BSF Sipai niin Assam atanga rawn lut a ni a, Rapid Antigen Test hmanga hri kai hmuhchhuah pathum te hi State pawn atanga rawn lut, Truck Driver te an ni bawk.

Hetihlai hian nimin khan Mizoram hmun hrang hrang atangin COVID-19 hri kai enkawl dam mi 40 te chu chhuahtir an ni ve leh thung a, heng hri kai enkawl dam te hi Tribal Art Centre leh Zokhawsang CCC atangin mi 18 ve ve bakah Pukpui CCC Lunglei, ZMC, Siaha CCC leh Serchhip DCHC atangin mi pakhat theuh an ni.

Heti hian nimin thleng khan Mizoram-ah COVID-19 hri kai hmuhchhuah chu mi 1353 an tling ta a, heng atang hian mi 790 te chu enkawl dam ni tawhin tunah hian hri kai enkawllai 563 an la awm mek bawk a ni. India rama hri kai hmuhchhuah tawhna State leh UT atangin Mizoram hi hri kai zinga nunna chan awmlohna awmchhun ala ni bawk.

India-ah hri kai sing kua chuang hmuh leh an ni :

India ramah COVID-19 hri kai 96,551 zet hmuh belh leh niin India rama COVID-19 hri kai hmuhchhuah chu 45,62,414 an tling tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,63,542 enfiah leh niin heng atang hian hri kai 96,551 hmuh leh an ni a, heti hian India ramah Sample 5,40,97,975 enfiah ni tawhin hri kai hmuhchhuah zawng zawng chu 45,62,414 an tling tawh a, India rama Sample enfiah atanga hri kai hmuhchhuah hi zaa 8.43 an tling tawh a ni.

India rama hri kai zingah darkar 24 kalta chhung khan mi 70,880 te chu enkawl dam leh niin tun thlenga enkawl dam chu mi 35,42,663 an tling tawh a, hri kai atanga chhutin enkawl dam hi 77.64% an ni a, hri kai enkawllai 9,43,480 an la awm mek a ni. India rama hri kai zingah nunna chan 76,271 an awm tawh a, darkar 24 kalta chhung khan mi 1,209 an thi tawh a ni.