COVID-19 hri kai enkawlna hmun dinhmun thlirho
CCC dinhmun thlirhona hun SAD Conference Hall-a neih ah hian tun dinhmunah Mizoram chhunga District hrang hrangah Civil mi COVID-19 hri kai enkawlna tur, Covid Care Centre (CCC) puan fel tawh 33 a awm thu tarlan a ni a, heng ah hian mi 1527 enkawl theih niin District hrang hrang dinhmunte uluk taka thlir a ni a, tun dinhmunah chuan Aizawl District tihloh chu ngaihtuahawm lutuk lo niin lang mahse a tul anga CCC atana hman tur dap zui zel tha an ti a. Aizawl District, a bik takin Aizawl khawpui leh a chhehvel hnaivai ah CCC tur ngaihtuah belh a tul hle a hriat niin a tlem berah mi 2500 vel tal vawikhata enkawl theihna tur CCC ngaihtuah a tulin an hria a ni.
He thutkhawm a tel te hian CCC atana hmun remchang vauchher deuh an neihte chu a rang lama enfiah turin an rel a, sawrkar building an chhinchhiah lawkte chu Department thlan bika Official-te bakah building awmna hmun Village/Local Level Task Force-te nen enho thin nise an ti a, chutiang bawkin Kohhran thenkhat leh YMA Branch thenkhat pawh rawn pen chhuak tanin an hmunhma te CCC atan hman an phal thute pawh hriat a nih tawh thu sawi a ni a, heng hmunhma te pawh hi mipuite tan a him tawk leh tawkloh endika finfiah turin sawrkar mi ruatte bakah a hmunhma neitu Kohhran, YMA te nen enho zel nise an ti bawk.
CCC chu Doctor leh Nurse ten an awmchilh reng thin avangin leh sawrkarin inkaihhruaina mumal tak a duan avangin mipuite tan ngaihthat lohna tur a awmloh thu he hunah hian tarlan a ni a. CCC atana ruatfel tawh, a hmunhma cheithat la ngaite pawh rang taka tihfel zung zung a nih theih nan ruahmanna siam a ni bawk. Heng bakah hian Quarantine Centre atana hman mek thenkhatte CCC atana thlak dan tur pawh he hunah hian sawiho a ni bawk a. Hei bakah hian Quarantine Centre leh CCC-a bawlhhlawh/hnawmhnawk thenfai chungchanga harsatna awm thei te pawh sawiho a ni bawk.
Comments
Post a Comment