Thenzawl Tuilakna tur PHE hotu ten an tlawh

Cheng nuai 511.96 seng-a Thenzawl khaw tui lakna tura Vanva lui khuahna tur chu niminpiah tlai khan PHE Department hotute chuan tlawhin hnathawh dan tur an en.

Thenzawl Vengthar, College of Horticulture ram mawng bula Vanva lui tui chu Thenzawl mipuite chawmna tura lak a ni dawn a. NABARD sum hmangin cheng nuai 511.96 senga Pump chhuak turin ruahmanna siam mek a ni a, hemi atana ruahmanna chi hrang hrangte chu PHE Engineer-in-Chief, Er. Lalmuanzova hovin a hmunah hian en a ni a, heng PHE Department hotute hi Thenzawl-a VCP pali (4) leh MNF Block hruaitu ten an tawiawm a ni.

Vanva Tui lakna tur enfiah a nih hnua Thenzawl PHE Department Sectional Officer Office-a inkawmna neih ah PHE Engineer-in-Chief chuan Vanva lui chu khawpui thli luanluh lohna a nih avangin mipuite tlan tur atan duhthusam a nih thu a sawi a, an hnathawh turah khawtlang hruaitute leh mipui tawiawmna a ngen a. Thenzawl khawtlang hruaitute pawhin Thenzawl mipui tui mamawhna nasat tawh zia hriaa sawrkar in Vanva tuilak tura a ruahman chu lawmawm an tih thu sawiin, tuilak hna chu a rang thei ang leh a tha thei ang bera thawh an duh thu leh a theihna ang anga tuilakna kawngah Sawrkar leh PHE hotute an thawhpui tur thu an sawi bawk a ni. Thenzawl hi In 2000 chuang awmna niin tunah hian Sailam ram-a PHE Department in Gravity a tui an lak chu an la ring a, hei hi an khamkhawp tawhlo tih kan thudawnna chuan a sawi bawk.