Serchhip-a Oil dah tur phurtu Challan chhuichian a nih theih nan FIR thehluh a ni

Serchhip-a Petrol Pump awmchhun, PB. Lalzuithanga Filling Station-a tunhnaia Oil dah tur rawn phurtu in Challan a rawn ken chu a lem nia hriat a nih avangin hemi chungchang chhuizui a nih theih nan nimin khan Serchhip Police Station-ah FIR thehluh a ni.

Hemi chungchanga nimin a Serchhip District Consumer Association; Legal Metrology, Serchhip; Serchhip Sub-Hqrs. YMA leh PB. Lalzuithanga Filling Station ten thuchhuah intawm an siam-ah an tarlan danin Serchhip Petrol Pump-a Oil dah tur chu tun thla ni 5 khan Ramnagar Depot atangin Oil Tanker (Vehicle No. MZ-06-5527) Driver, Azam Hussain Laskar chuan Serchhip panin a rawn phur a, a tuk Sept. 6, 2020 zan-ah Serchhip rawn thlengin Sept. 7, 2020-ah Legal Metrology ten Unload hmain Oil Density hi an enfiah a, hetah hian Oil Depot atanga Oil an lak hlima Company in Challan an tihchhuah, Oil Transporter hnena E-mail hmanga an thawn leh Tanker Driver in Challan a rawn ken chu a Density a in anglo tih hmuhchhuah a ni a, Motor khalhtu in a ken Challan-a a lan dan chuan Oil Density hi 759.40 a ni a, hetihlai hian E-mail hmanga Transporter ten challan an dawn a Density chu 756.40 a ni thung.

Hetianga Challan-a Density a danglam chuan Oil pawlhdal theihna chance tam tak a awm thei tih hriat a ni a, hemi chungchangah hian Legal Metrology Inspector hovin nimin khan District Consumer Association, Serchhip Sub-Hqrs. YMA leh Serchhip Petrol Pump neitute chuan hmalak dan tur sawiho in Legal Metrology lam hian IOC Sales Manager, Mizoram bialtu, Alok Vishal Kumar chu bepawpin thil awmzia an zawtfiah a, IOC Sales Manager chuan E-mail hmanga Challan dawn hi a dik zawk thu leh Driver Challan ken chu a lem (fake) anih a rinawm thu a rawn sawi a. Hetiang hi thil awmdan a nih tak avangin hetianga Challan lem leh Seal lem te hmanga mipui hman tur Oil pawlhdala mipui lo bum thin an awm chu pawi an tih thu an sawi a, thil diklo titu zawnchhuah a nih a Challan lem siamchawp a Seal lem te lo hmangtu leh Oil lo pawlhdal thin te hi zawnchhuaha Dan anga an chunga hremna pek anih ngei theih nan Serchhip Police Station-ah FIR an thehlut zui ta a ni.

He FIR thehluh ah hian Legal Metrology Inspector, PB Lalzuithanga Filling Station-a Manager, Serchhip Sub-Hqrs. YMA President leh Serchhip District Consumers Association-a Secretary ten an hming an ziak a ni.

Comments

Chhiar Hlawhte