VC thlang turin inbuatsaihna peihfel thawkhat

Tunkar Ningani a Village Council inthlanpui neih tura Serchhip District-a inbuatsaihna peihfel thawkhat a ni ta.

Serchhip District-a Village Council inthlanpui neih tur atan hian nimin khan Serchhip District chhunga Returning Officer tura ruat te tan Serchhip DC Conference Hall-ah training vawi hnihna chu neih leh niin he hun hi Election Officer, Vanlalhmachhuana chuan kai-hruaiin VC Area hrang hranga inthlanpui neih tura Returning Officer te chu inthlan buatsaihna tura an inbuatsaih dan leh ruahmanna an siam hrang hrang te a sawipui a, hemi hnu hian Resource Person, Dorothy Muansangi, SDO (Civil) North Vanlaiphai chuan inthlanna atana hriattur pawimawh hrang hrang leh Vote chhiarna atana pawimawh hrang hrangte chu a zirtir bawk a ni.

Nimin-a training neih zawh hnu hian RO thenkhat te chu inthlanna atana hman tur bungrua te pekchhuah nghal an ni a, Vawiin-ah a hmun ngaiah hian Presiding Officer te tan training hnuhnung ber buatsaih lehin inthlanna a hman tur bungrua semchhuah fel nghal a ni ang.