Serchhip-ah Bawrhsap hovin VC inthlan ni-a mipui himna tur sawihona neih a ni

Nimin khan Serchhip District Election Officer, Kumar Abhishek hovin tunkar Ningani-a Village Council inthlanpui neih tura Polling Station kalpui dan tur leh ruahmanna siam dan tur chu tlawmngai pawl hrang hrang ten an sawiho.

He sawihona hun Serchhip DC Meeting Hall-a neih ah hian District Bawrhsap leh District Eletion Officer, Kumar Abhishek chuan mipuiten COVID-19 hrileng mek karah him taka vote an thlak theih nan State Election Commission chuan State Level-a tlawmngai pawl hrang hrang aiawhte a lo sawipui tawh thu leh chumi hmalakna kal zelah Serchhip District chhungah pawh mipuiten kokim tak leh him taka vote an thlak theih nan ruahmanna siam a ngai tih a sawi a. Election Commission in himna tura dan a duante leh sawrkar thupek dinglaite hre renga ruahmanna siam a tul tih sawiin, chumi hmalakna duang tura thutkhawm hi koh a nih thu a sawi bawk.

He thutkhawm a tel te hian State Election Commission in tumkhatah Polling Area-ah vote thlak tur mi 50 aia tam lo, ft. ruk (6) danah inhlat zela awm tur a a tih angin khawtin-a MPF emaw, YMA emaw VLTF emaw ten he inkaihhruaina hi a hlawhtlin theih nan ruahman lo siam se tiin an khawtlanga a remchan dang zelin a YMA Section emaw, a Veng thler emaw, Electoral Roll-a Serial number milin emaw darkar tin-a vote thlak tura kal tur ruahman se, chutianga mipuite pawhin vote an thlak theih nan Information Mike-ah taima taka au reng ni se, a ti a. Vote thlak tura kal ten sawrkar dan dinglai angin Mask emaw, puan-in emaw an hmai an tuam ngei ngei tur a ni a. Mi, a vote thlak hun tura ruatah a lo kal hman ngang lo anih chuan a rawn kal hman huna midangte ruala intlar ve tir mai tur a ni thung ang a, vote thlak inkhap sak a rem dawn lova. Vote thlak tur kum upa te, damlo te, pianphung rualbanlo te, raipuar leh naupawm te an kal chuan intlar khawmuan tir lova vote thlak tir nghal tur a ni ang.

Mizoram chhung khaw dang attnga vote thlak tura mi an haw lo khap emaw, Vote thlak tir phal loh emaw pawh a rem lo tih he hunah hian tarlan niin, him taka Voters zawng zawng ten vote an thlak dan tur lo ruahman mai zawk tur a ni tih he hunah hian tarlan a ni a. Polling Area chhungah Social Distancing tha taka kalpui tur anih avangin tlawmngai pawl chuan ruahmanna lo siamin a remchan danin voters te din tlarna tur lo an lo duang anga, Voter Registration leh Vote thlaktute Hand sanitizer lo pe zeltu tur mihring pawh lo inruahman tur a ni anga. Mipuite hnenah Vote thlak chu a him ngei a ni tih hrilh-a vote thlak tura uar taka insawm nise a ti bawk. Heng ruahmanna te hi Official duty te nena engkim ruahman ho zel tur a ni ang.