Thahnem ngai leh fimkhur taka Vote thlak turin ngen

ZPM chuan mipuite chu thahnemngai leh fimkhur taka Vote thlak turin an ngen.

Nimin-a Aizawl Press Club-a thuthar thehdarhtute an kawmna ah ZPM General Hqrs. hruaitute chuan tun thla ni 27-a Mizoram State Election Commission in inthlan a buatsaih tur chu inthlanna chhinchhiah tlak leh hriatreng tur a ni tih sawiin, harsatna hrang hrang thleng mek te an sawi a. Tun thla ni 20-a SEC-in Central YMA leh MPF te a kohkhawmah pawh hetiang hripui (Covid-19) vanga kan in lockdown mek leh hripui pawh ala darh mek zel nia a lan avanga inthlan neih chu a him lo nia anhriat thu sawi chhuah nia an hriat thu leh SEC hian an thuneihna a nih loh thu sawiin, inthlan buatsaih ngei tur a nih thu an hrilh nia an hriat thu an sawi.

ZPM hruaitute chuan hetiang hripui leng karah hian mi tam takin vote thlak tura kalchhuah an hreh a rinawm nia sawiin, Vote tla pawh a tlema rinawm thu sawiin, “Hei tak hi sawrkar hian remchanga lain Ruling Party te chauhin vote thlak se, awlsam te-a chak an tumna mai niin a lang,” an ti a. Hei vang hian hetiang boruak a awm chunga VC/LC inthlan buatsaih luih anih avang hian mipuite thahnemngai leh fimkhur taka vote thlak theuh turin an ngen a ni.