Chanchin thar thenkhat :

 Bialtu MLA in tlawh

Tunhnaiah Sakawrdai khua ah COVID-19 hri kai hmuhchhuah leh a nih avangin nimin khan Tuivawl bialtu MLA leh School Education Minister, Lalchhandama Ralte chuan Sakawrdai hi tlawhin Village Level Task Force (VLTF) te nen inkawmna an nei a, Tuivawl bial chhunga a khaw pathum- Sakawrdai, Darlawn leh Sawleng khua ah COVID-19 positive hmuhchhuah belh an awm tak avangin Mizoram sawrkar chuan Tuivawl bial chhunga hrileng a darhzel lohna turin kawng hrang hrangin hmalakna a kalpui mek tih sawiin, he hripui leng hian hun engemaw ti chhung chu min chenchilh rih dawna alan avangin mipuiten sawrkar inkaihhruaina hrang hrangte zawm a, fimkhur taka nun kan hman a tul a ni, a ti bawk.

CM Relief Fund atangin pe

Chief Minister’s Relief Fund for COVID-19 atangin Rs. 2,88,45,000/- chu nimin khan pek-chhuah leh a ni a, nimin a sum pekchhuah te hi Directorate of Health Services-ah Rs. 1,40,29,000/-; Directorate of Hospital & Medical Education-ah Rs. 1,32,42,000/-; ZMC-ah Rs. 7,24,000/-; DC Aizawl-ah Rs. 5,00,000/-; DC Kolasib-ah Rs. 3,00,000/- leh Israel Zochhuanpuia, Zokhaw-thar (VLTF Duty) tan Rs. 50,000/- te a ni.

Mamit-a Vote thlak dan tur

Nimin khan Mamit-ah District Election Officer leh District Bawrhsap ni bawk, Dr. Lalro-zama IAS hovin Mamit khawpui chhunga MPF leh VLTF hruaitute'n Village Council General Election, 2020 lo awm tura hrileng laka mipuite an him theihna atana vote thlak dan tur an sawiho a, he huna ruahmanna an siam dan chuan zing dar 7:00 atanga dar 9:00 thlengin kum 60 chin chunglam leh hnathawka chhuak duh ten Vote an thlak anga, dar 9:30 atanga 12:00 Noon-ah kum 45 atanga 60 inkar ten Vote thlakin dar 12:30 atanga 2:30 inkarah kum 30 leh 45 inkar ten Vote thlakin dar 2:30 leh 5:00 inkarah kum 30 hnuailam ten Vote an thlak thung ang.

Hri kai 2 enkawl dam leh

Mizoram-a COVID-19 hri kai enkawl mi 2 te chu nimin khan enkawl dam niin anmahni enkawlna hmun atanga chhuahtir an ni a, heng mite hi Lunglei District Zobawk CCC-a enkawl te an ni. Heti hian Mizoram-ah COVID-19 hri kai hmuhchhuah chu mi 918 niin mi 461 te chu enkawl dam an ni tawh a, midang 457 te enkawl mek an la awm bawk. Hri kai zingah Aizawl District mi tam berin 279 enkawl an ni a, Kola-sib District-ah 128 enkawl an ni bawk.

Hri kai nuai 31 tling tawh

India rama COVID-19 hri kai hmuhchhuah chu nuai 31 an tling leh ta a, hri kai zingah enkawl dam pawh zaa 75.26 an tling tawh. Ministry of Health & Family Welfare chhinchhiahna atanga a lan danin India ramah hian darkar 24 kalta chhung khan Sample 6,09,917 enfiah leh niin heng atang hian hri kai 61,408 hmuh leh a ni a, heti hian India rama Sample enfiah zawng zawng chu 3,59,02,137 niin hri kai hmuh pawh 31,06,348 an ni ta a, India rama Sample enfiah atangin hri kai hmuhchhuah hi zaa 8.65 niin tunah hian mi 23,38,035 chu enkawl dam an ni tawh a, hri kai hmuhchhuah atangin enkawl dam hi 75.2 niin hri kai enkawllai 7,10,771 an la awm mek bawk a ni. India rama hri kai hmuhchhuah zingah nunna chan 57,542 zet an awm tawh bawk a ni.