Hnahthial Lungleng Veng in Vote thlak tumlo

Hnahthial Lungleng Veng Joint Action Committee chuan tun thla ni 27-a Village Council inthlanpui neih turah an veng mipuite chuan Vote an thlak dawnlo tih an sawi.

Hnahthial Lungleng Veng Joint Action Committee hian nimin khan thuchhuah siamin Hnahthial South-I Village Council atanga Hnahthial South-III Village Council thar siamah Lungleng Veng chhungkaw 60 chu South I-ah dah niin, South-III lamah chhungkaw 70 behtir an ni thung tih an sawi a, Lungleng Veng Joint Action Committee chuan an Veng thendarh zawnga Village Council thar siam chu hriatthiam har an tih thu leh an lungawilohzia lantirna leh Village Council khata an Veng pumpui awmho vek an duhzia lantirna atan tun tum Village Council inthlanah hian India ram danpui zah tak chung leh hreh tak chungin vote thlak loh an titlu ta tih an tarlang a ni.

He thuchhuah a an tarlan danin Village Council inthlanna neih ni hi Black Day-ah puangin, chhungtin te'n mahni In-ah puandum an zar vek dawn a; Lungleng Veng voter 460 chuangte chuan an vote hlu tak chu VC Candidate tuma hnenah an hlan thei dawn lo tih sawiin, chu mai bakah Candidate zahawm tak takte pawh an theih leh thiam ang pawhin tumah an pui thei dawn lo tih an sawi a. Mizoram-ah khawi Veng mah thendarha Village Council hranga dah luih an awm an hre ngailo tih an sawi bawk.