Ruling leh Opposition VC a danglam lo tih sawi

Mizoram Pradesh Congress Committee (MPCC) hruaitute chuan Ruling VC leh LC nih vangin pawisa a dawn tam ngawt theih tawh loh niin an sawi.

Nimin-a Aizawl Press Club-a thuthar thehdarhtute an kawmna ah MPCC thupuangtu, Lallianchhunga chuan August 27, 2020 a Village Council leh Local Council inthlan lo awm turah rorelna chelh mektu (ruling) MNF party in an Party Candidate te thlantlin khua leh veng tan chauha hmasawnna leh hamthatna awm thei tur angin thu belhchian dawllo an sawi tih sawiin, “Minister pakhat phei chuan ‘Ruling VC thlan chu Sekibuhchhuak ang, Opposition VC thlan chu chawhmeh hing ang’ tiin mipui thlanchhuah ve tho Opposition VC te chu hmusit takin ‘Chawhmeh hing’ nen a tehkhin nghe nghe a ni,” an ti a. Hetianga mipui thlanchhuah ve tho mawi lo taka tehkhin hi anmahni thlangtlingtu mipui hmusitna tawpkhawk ni-ah an ngaih thu a sawi.

MPCC hruaitute chuan Congress hunlai atang tawh khan Opposition Village Council leh Ruling Village Council te’n State Finance Commission (SFC) rawtna angin an chanpual tur an chang vek tih sawiin, Ruling VC nih vangin sawrkar atangin tanpuina an dawn tam ngawt bikloh thu leh Opposition VC te pawhin an chanpual tur an chan vek thu an sawi bawk.