Manifesto 40 chuang ti hlawhtling niin sawi

MNF Vice President, Lalthlengliana chuan MNF sawrkar in an Manifesto-a an tiam 40 chuang an ti hlawhtling hman tawh tih a sawi.

Nimin-a Aizawl Press Club-a thuthar thehdarhtute a kawmna ah MNF Vice President chuan Mizoram in kum 2018 kumtawp-ah MLA inthlanpui kan neih thu leh December ni 15, 2018-ah sawrkar thar lakluh a ni tih sawiin, hemi hnu lawk hian sum awm ang angin Chief Minister in kawngpui thawmthat hna a kalpui nghal tih a sawi a. Parliament (MP) Inthlan puan niin thla 3 chhung zet Election Code of Conduct-in min phuar leh a, hemi hnuah Sawrkarin hmalakna hrang hrang kalpuiin, Project ropui tak tak Central-ah thehthlak a ni a, engemaw zat min pawmsak laiin COVID-19 hripui avangin duh angin hmalak theih a ni lo tih a sawi bawk.

MNF Vice President chuan sawrkar hmalakna hrang hrangte pawh tarlangin, Zu zawrh tihtawp a nih thu te, SEDP hnuaiah kawng hrang hrangah hmalak a nih thu te leh buh leh bal-a intodelh tura an hmalakna te bakah Sports leh Tourism lama an hmalakna te a tarlang a. Tunhnaia Assam Rifles mi leh sa ten Vairengte Check Gate an paltlang luih chungchang ah Assam Rifles hotulu hnenah department kaltlangin lehkha pek an nih thu leh tunah hian Mizoram Sawrkar chuan Ministry of Home Affairs-ah a thlen mek thu a sawi bawk.