Mizoram-ah hri kai hmuh belh zel an ni, Enkawl dam aiin enkawl mek an tam tawh zawk

Inrinni khan Mizoram-ah COVID-19 hri kai mi 28 zet hmuhchhuah leh niin Mizoram-a COVID-19 hri kai enkawl dam aiin enkawl mek an tam leh tawh zawk a ni.

Inrinni-a hri kai hmuhchhuah thar mi 28 zinga 25 hi ZMC Laboratory-a RT-PCR khawl hmanga Sample enfiah atanga hmuh niin midang 3 te hi Kolasib District-a Rapid Antigen Test hmanga hri kai hmuhchhuah an ni thung a. ZMC Laboratory-ah hian Inrinni khan Sample 149 enfiah niin heng atang hian hri kai 25 hmuchhuakin mipa 22 leh hmeichhia 3 an ni a, Aizawl District-a mi 24 leh Lawngtlai District-a mi pakhat te an ni. Aizawl District a hri kai hmuhchhuah zingah hian BSF sipai 17, kum 24-44 inkar an tel a, an zinga 15 hi Uttar Pradesh atanga lo kir niin Andhra Pradesh leh Rajasthan atanga lo kir pakhat ve ve awmin an vai hian Qarantine Facility-a awm lai leh Symtom neilo an ni.

Aizawl District-a COVID-19 vei hmuhchhuah thar zingah hian hri kai tawh te atanga kaichhawng mi 3 awmin an zinga pakhat hi Frontline Worker (Doctor), Sample laa kal thin a ni a, COVID-19 Symptoms a neih avangin ZMC-a lo admit tawh a ni a, midang pahnih te hi Mizoram Police, BSF Quarantine lai mekte vengtute an ni thung. Heng mite baka hri kai hmuhchhuah 4 te hi mipa 2 leh hmeichhia 2 niin, mi 3 te hi chhungkua niin Assam atanga rawn haw an ni a, midang pakhat hi Tripura atanga rawn haw mipa kum 33 mi a ni a, an vai hian Quarantine Facility a awm lai mek niin COVID-19 symptoms nei an awmlo bawk.

Inrinni-a Lawngtlai District-a COVID-19 hri kai hmuhchhuah hi hmeichhe naupang kum 7 mi a ni a, positive contact (a nu) atanga kai ni a hriat a ni a, COVID-19 symptoms a neih vanga Sample enfiah sak a ni bawk.

Hetihlai hian National Highway-306 siam avanga Sethawn leh Thingdawl inkara bungraw phur Truck tangkhang khalhtu driver leh handyman te enfiah chhunzawm ah Inrinni leh nimin khan mi 497 enfiah niin hri kai mi 18 hmuh leh an ni a, heng mite hi kum kum 20 leh 17 inkar, Assam mi 17 leh Rajasthan mi pakhat niin COVID-19 hri kai lanchhuahna neilo te an ni.

Nimin thleng khan Mizoram-ah COVID-19 hri kai hmuhchhuah chu mi 608 an tling ta a, heng zinga 298 te chu enkawl dam ni tawhin hri kai enkawllai 310 an awm mek a, hri kai enkawl dam aiin enkawl mek hi an tam leh ta zawk a, Kolasib District-a hri kai hmuhchhuah pakhat chu Assam-a enkawl tura lak leh a nih tak avangin Mizoram atanga State pawn-a enkawl tura lak chu mi 2 an ni ta bawk a ni.

India ramah COVID-19 hri kai nuai 21 an tling tawh :

India rama COVID-19 hri kai hmuhchhuah chu nuai 21 an tling ta a, darkar 24 kalta chhung khan India ramah hri kai 64,399 zet hmuh thar an awm a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 7,19,364 enfiah leh niin heng atang hian hri kai 64,399 hmuhchhuah leh niin hei hi nikhat-a hri kai hmuh tam ber ni a ni leh a ni. Hetihlai hian hri kai enkawl dam pawh pung ve zelin darkar 24 kalta chhung khan mi 53,879 enkawl dam an ni a, hri kai zinga enkawl dam chu 14,80,884 tling tawhin hri kai hmuhchhuah atanga zaa 68.78 te chu enkawl dam an ni tawh a, tunah hian enkawllai 6,28,747 an la awm bawk a ni.

Darkar 24 kalta chhung khan hri kai zinga mi 862 ten nunna chanin tun thlenga hri kai zinga nunna chan hi 43,379 an tling tawh a ni. ICMR chhinchhiah danin India ramah hian sample 2,41,06,535 enfiah ni tawhin Sample enfiah zawng zawng atanga zaa 8.93 te chuan hri hi an kai a ni.