SEC in VC/LC inthlan a buatsaih dan ZPM in mak an ti

ZPM President, Lalliansawta chuan sawrkarin State Election Commission kaltlanga Village leh Local Council inthlan a buatsaih danah mak tih tak tak an nei tih a sawi.

Inrinni-a Aizawl ZPM Office-a thuthar thehdarhtute a kawmna ah August 5-a Village Council leh Local Council inthlan pual a nih rualin Nomination koh nghal a ni tih sawiin, August 11-ah khar leh a nih thu a sawi a. Hemi karah hian Public Holiday ni 2 a awm tih sawiin, inbuatsaihna atan ni 5 chiah hun a awm thu leh Nomination koh hnua RO ruat chawp te pawh a awm nia an hriat thu a sawi a. Heti chuk chuk-a Village Council leh Local Council thlanna buatsaih hi a awm ngailoh thu sawiin, “Sawrkar hi mipuiin an hrechiang telh telh a, hriat chian lehzual hma an chuh ni berin kan hria,” tiin August ni 4-ah SEDP an sem thu leh ni 5-ah inthlan puan a nih thu a sawi bawk.

ZPM President chuan ZPM chu Recognised party a la nih ve loh avangin inthlan huna an candidate ten chhiahchhiahna inang hman phalna ECI-a an dil chu phalsak ni mahse, Candidate tin ten an thil tel tur, ECI Registration Certificate chu khaw tina thawn thlen hman rual a ni dawn lo tih hriain MNF sawrkar chuan hmanhmawh takin inthlan hi a buatsaih nia an hriat thu a sawi bawk.

Hripui leng vanga khaw lian leh khaw te hmun tam takah inkharkhip khauh tak puan anih mek lai leh lirnghing avanga mi tam takin hmun him lam pana hna an thawh theih loh laia VC/LC inthlan puan luih chu, mipuite harsatna tawrh mek sawrkarin a hre lo nia an hriat thu pawh ZPM President chuan sawiin, Polling Booth leh Polling Party zawng zawngte PPE-a thuam vek turin an phut thu a sawi bawk.