Home Minister, Lalchamliana chuan nimin chawhnu khan Brig. Vinod S, DIG 23 Sector Assam Rifles chu kovin tunhnaia Mizoram Sawrkar leh Assam Rifles inkara thu inhmu lo awm mek chungchang a sawipui.
He hunah hian Brig. Vinod S chuan tunhnaia thil thleng chungchang Assam Rifles thlir dan leh harsatna an tawh te sawiin, Home Minister chuan Assam Rifles lam harsatna te a ngaihthlak sak rualin Mizoram Sawrkar duh dan a hrilh ve thung a. Ramri ven kawngah te, ruihhlo leh thil thalo dang venna kawnga Assam Rifles te hna thawh chu Mizoram Sawrkarin a hria tih sawiin, thawhhona tha awm zel se a duh thu a sawi a; thuchhuah siam zung zung bansanin harsatna an nei a nih chuan ama hnena hrilh hrehlo tur leh dawhkan kila sawiho hmasak thin a that thu a hrilh a ni. COVID-19 avanga Mizoram Sawrkarin invenna leh fimkhurna tura ruahmanna a siam te pawh indanna ni lovin kan him tlanna tur zawk a nih avangin zawm zel turin a hrilh bawk.
He hunah hian Brig. Vinod S chuan Ministry of Home Affairs in State leh State inkar leh State chhunga vahvel phalna a pe chungin an chetvelnaah Mizoram Sawrkar ruahmanna te zawm chu an duh ber a ni tih a sawi a. Mizote nen thian an nihna vawnhim a duh thu te, Social Media leh thildanga thu vawrhdarh hmaa amah biaa titipui duh tan a inhawn reng thu te, a enkawl Assam Rifles sipai zingah dan bawhchhia leh che mawilo an awm a nih chuan chiang taka finfiahna nen report thehlutin an phutawk hremna a pek zel tur thu te a sawi ve bawk a ni.
Comments
Post a Comment