India ramah COVID-19 vanga thi awmlohna awmchhun kan ni - Health Minister

 Health Minister, Dr. R. Lalthangliana chuan India ram bung hrang hrang zingah Mizoram chu COVID-19 vanga thi awmlohna awmchhun kan nih bakah hmalakna kawng hrang hrangah pakhatna kan la ni mek tih sawiin, he natna dona kawnga hmalatute tana tawngtai thin te chungah lawmthu a sawi bawk.

Nimin-a a bial, South Tuipui bial-a Tuipui D, Darzo, S. Vanlaiphai, New Kawnpui, Lungpuitlang leh Muallianpui khua te a tlawhna ah he thu hi sawiin Health Minister, Dr. R. Lalthangliana chuan India ram bung hrang zinga COVID-19 vanga thi awmlohna awmchhun kan ni leh hmalakna kawng hrang hranga pakhatna kan ni chu mipuite thuawihna leh thawktute inpekna Pathian in mal a sawm avang a ni tih a sawi a. Tuna hri kai pung tam anga kan lan chhan chu Paramilitary Force rawn lut zingah kai an tam vang a ni tih sawiin, “COVID-19 natna do hi hautak leh buaithlak tak nimahsela 'Chona' ah ka ngaiin Zoram mipui tan hian ka tlanchhe dawn lova, theihtawp ka chhuah zel dawn a ni,” a ti.

Health Minister chuan a bial, S.Tuipui chu an vanneiin hun rei tak COVID-19 vei an awm loh thu sawiin, an fimkhur zual zel erawh a ngai tih a sawi a. “He natna hi tawngpawng hlauh viau ringawt hian awmzia a nei lova, awmze neia kan fimkhur a ngai zawk a. Sawrkarin ruahmanna a siam hrang hrangte zawm thain Mask vuah uarin kut silfai ngun ila, midangte hnaih lutuk lovin i awm ang u,” tiin he natna do kawnga hmalatu te tana tawngtai thintute chungah lawmthu a sawi a. Village Council inthlanna lo awm turah pawh CO-VID-19 laka mitin te an him theih nana sawrkar ruahmanna te th taka zawm turin a chah bawk.

SEDP chungchang pawh sawiin Health Minister chuan, “Kalpui mai turin ruahmanna kan siamfel vek tawh laiin COVID-19 avangin beisei leh tum angin kan la kalpui thei lova, budget tharah chuan chaktak kalpui theih ngei kan inbeisei a ni,” a ti bawk.

South Tuipui bialtu MLA chuan Village Council inthlanna lo awm turah South Tuipui bial chhunga MNF thlantlin vekna khua te hnenah lawmman a siam sak tur thu a sawi a. South Tuipui bial mipuite chu District thar lawmthu sawi nan MNF VC Candidate te thlangtling vek turin a ngen nghal bawk.

Comments

Chhiar Hlawhte