COVID-19 dona sum hman dan puanzar phut

ZPM Thalaite chuan mimal, Pawl, Kohhran leh MLA inphal ten COVID-19 dona atana sum an pekkhawm chu ‘Sawrkar in sum siam nan hman a tum em ni?’ tiin sawrkar chu an zawt. Nimin a thuchhuah an siamah ZPM Thalaite chuan Directorate of Information & Public Relations-in July ni 28, 2020-a thuchhuah a siamah Chief Minister Relief Fund (CMRF) hmanna khaikhawmnaa tarlan zingah COVID-19 kai leh kai loh enna, Truelab Quattro Realtime Quantitative Micro PCR Machine (Truenat) sawm (10) leina atan Rs. 2,01,15,000/- leh Truelab Quattro Realtime Quantitative Micro PCR Machine (Truenat) ken tel mamawh (equipments, etc.) leina atan Rs. 1,18,68,830/- hman a nih thu tarlan a ni tih tarlangin, sum la hman loh Rs. 3,94,70,767/- a nih thu tarlan a ni bawk tih an tarlang a.

ZPM Thalai hruaituten Truenat siamtu, Molbio Diagnostics Pvt. Ltd. Region Office an biakna ah Truenat khawl pakhat chu nuai 20 bawr vel a nih thu leh chu chuan Screening leh Confirmation Test Kit engemaw zat a chhawm thu an lo hrilh nia tarlangin, Chief Minister Relief Fund atanga Truenat hman a nih theihna atana mamawh lei nan cheng nuai za chuang sen a nih si laia Swab sample test man lak a ni ta chu pawi an tih thu an tarlang a.

Hei bakah hian ZPM Thalaite chuan Ministry of Home Affairs (MHA) atangin Mizoram sawrkar-in State Disaster Relief Fund (SDRF) atan vaibelchhe tam tak a dawng bawk nia tarlangin, he sum hmanral dan puanzar an phut thu an sawi a. “Mimal, Pawl, Kohhran leh MLA inphal ten COVID-19 dona atana sum an pekkhawm hi sum siam nan kan sawrkar hian hman a tum ta mai em ni?” tiin an zawt nghal a ni.