PM Economic Package hnuaia Industry-te intunnunna tur loan chungchang sawihona nei

Chief Secretary, Lalnunmawia Chuaungo chuan Mizoram chhunga Bank hrang hrang hotute leh Mizoram Industry Owners Association (MIOA) hruaitute chu nimin khan a pisa-ah kawmin Sawrkar Laipui Ministry of Micro, Small and Medium Enterprises (MSME) hnuaia Industry neitute intunnunna, tur Prime Minister’s Economic Package chungchang a sawipui. 
COVID-19 hripui leng avangin India ramchhung hmun hrang hranga Industry neituten an tuar hle tih hriain Sawkar Laipui chuan sum-a harsatna tawk mek industry-te khaichhuahna turin ruahmanna, Prime Minister’s Economic Package a siam a. He package hnuaiah hian MSME hnuaia loan account nei mekten dahkham ngailo (Collateral Free) loan an la thei a. He loan latute tan hian kum khat chhung rulh let a ngai lo a, kum khat ral hnuah thla 36 (kum 4) chhungin thlatin installment inang khatin an rul thei dawn a ni. Industry loan hi a tlangpuiin 10.5% atanga 13% a sanga rulh a ngai thin a, he Special Package hnuaiah erawh chuan 7.5% atanga 8.5% a sangin a rulh theih dawn a ni.
Sawrkar laipuiin he loan thar a duan hi vawikhata pektlak nghal ngai emaw ti mi engemawzat an awm avangin nimin a thutkhawm-ah hian inhrilhfiah a ni a. COVID-19 avanga inkhuahkhirhna (lockdown) kalpuiin nasa taka a nghawng Industry neituten bul an tan that leh theih nan he loan hi duan a ni a, a mamawhtuten an hman tangkai thuai a duhsak thu Chief Secretary chuan a sawi bawk.

Comments

Chhiar Hlawhte