August ni 15 thleng State pawn lam atangin Mizoram-ah sipai luh phal a ni dawnlo

Mizoram Chief Secretary, Lalnunmawia Chuaungo chuan nimin khan Indian Army leh Paramilitary Forces hotute Chief Secretary’s Conference Hall-ah kokhawmin August 15, 2020 thleng hian Sipai leh Paramilitary Forces mi leh sa reng reng Mizoram pawn atanga rawn luh khap a ni dawn.
Tunhnaiah Sipai ho zingah COVID-19 hri leng a darh avanga Health Minister, Dr. R. Lalthangliana hova thutkhawm hmanhmawh neih in an lo rel tawh bawhzuia nimin a thutkhawm ah hian Chief Secretary, Lalnunmawia Chuaungo chuan sipai zingah COVID-19 darh nasa lutuk chu a rang thei ang bera tihtawp a tul takzet tih sawiin, hmalakna pawimawh hmasa ber chu sipai ho zingah State leh State inkara zin veivah khap chu a ni tih a sawi a. Sipaite chu Unit hrang hrang inbanleta, inthlak reng an nih avang leh chhuti (leave)-a kal leh haw lam insulpel reng an nih avangin Inter-State Movement a nasa hle a, tul tawpah lo chuan hei hi khap tlat turin a hriattir a ni.
India ram-a State dangte ngaihtuahin Mizoram chu hripui leng lakah thui tak kan la inveng thei tih sawiin Chief Secretary chuan, tuna Case awm mek tam zawk hi pawnlam atanga rawn lut an ni tih a sawi a, State dangte aiin inkhuahkhirhna khauh zawk kalpui a nih avanga inveng rih hram hram thei kan nih thu leh amaherawhchu, Sipai zingah nasa taka he hri hi a darh mek avangin khuahkhirh vat a nih loh chuan Civil mi, mipui mimir zingah a darh hun a awm ngei ngei dawn tih a lan reng avangin Mizoram sawrkarin inkhuahkhirhna, SOP a duan khauh lehzuala kalpui turin sipai hotute chu a hriattir a. Mipui zingah sipai hlauhna a intuh nasa tawh tih pawh sawiin, chuvangin langtlang taka COVID-19 laka sipaiho inven dan leh an hmalak dante puanzar a tul thu pawh a sawi a. Civil mi tangkhang sing chuang sawrkarin a lakluh zingah COVID-19 hripai tlem azawng chauh hmuhchhuah an nih laia sipai ho zingah heti taka COVID-19 vei an tam chu an inenkawl danah fello leh diklo a awm ngei tih a chiang nia sawiin, khirh leh khauh leh zuala State sawrkar hriatpuia hmala turin a hrilh a. Anmahni awmna area huamchhunga Local leh Village Level Task Force te nen an hmalakna te inhrilhhre zung zunga hma an lakna te inhriatpui tlang turin a hrilh bawk a ni.
He hunah hian Mizoram DGP, SBK. Singh pawhin BSF Camp Gate pui pawn lam, an Camp panna kawngpui tawp zelah Mizoram Police duty an indah dawn tih a sawi bawk.
Sipai leh Paramilitary Forces hotute pawhin he hunah hian an hmalak dan sawiin, an mi leh sa reng reng, Mizoram-a lo kir hlim emaw, awm mekte pawh quarantine an nih dan leh Gate pel-a chhuah khap tlat an nih dan an sawi a. Assam Rifles hian Zokhawsang-ah Quarantine Centre leh CCC an nei a, Mizoram sawrkar Facility-te hman ngai lovin an Camp-ah khirh taka Quarantine an kalpui thu an sawi bawk.
BSF hian hmun an neih that tawk loh avangin Mizoram sawrkar Quarantine Facility leh CCC te an hmang a. Aizawl khawpui chhunga In luah leh mahni In nei sipaite pawh March thla atang khan BSF hmunah awmkhawmin an nupui fanaute tlawh tura chhuah pawh phalsak an ni lo tih an sawi a. Chhuti-a kal mekte engemaw zat an chawlh hun pawhsei sakin, Mizoram chhunga awm mek te chhuti-a kal an khap bawk a ni.
He Meeting hian August ni 15, 2020 thleng hian sipai leh Paramilitary Forces mi leh sa reng reng Mizoram pawn atanga rawn luh khap turin an rel a, Mizoram dinhmun a zirin an lo luh theih hun tur ngaihtuah that leh a ni ang.
May, 2020 atanga July, 2020 chhungin Mizoram Home Department chhinchhiah danin Assam Rifles 1023, BSF 648, NDRF 38, Aizawl Military Station 81, CRPF 130, BRO 204, an vaiin mi 2124 ten lirthei hmangin Mizoram an rawn lut a ni.

Comments

Chhiar Hlawhte