VC Roll siam hna thawk chhunzawm leh dawn

Mizoram-a Village Council inthlanpui neihna tura Electoral Roll siamthat hna thawh mek chu chhunzawm a ni leh dawn ta.
Hemi chungchangah hian Mizoram State Election Commission (SEC) chuan nimin khan thuchhuah siamin Mizoram sawrkar-in Sixth Schedule Area pawnlama Village Council te term thla khat (one month) dang a pawhsei sak tawh tlawhchhanin Non Sixth Schedule Area bika Village Council inthlan lo awm tur atan Summary Revision of Village Council Electoral Rolls kalpui mek chu chhunzawm leh a ni dawn a. Draft Roll lo tarchhuah tawh leh siamthat ngai leh inthunthar turte tana dilna thehluh hun lo siam tawh te chu zawhfel ni tawhin, tun thla ni 15 atanga July 21, 2020 thleng khian heng dilna te hi enfiah hna thawh a ni dawn a, a tuk July 22 atangin Electoral Roll thar chhut hna thawkin tun thla ni 29 khian Final Electoral Roll chu tarchhuah a ni ang.
Tarlan tawh thin angin Mizoram-a Village Council dinglai te hun hi May thla khan tawp tur niin hei vang hian inthlanna a hman tur Electoral Roll siamthat hna chu March thla atang khan thawh tan a ni a, amaherawh chu hri leng avanga chhunzawm theih a nih tak loh avangin Electoral Roll siamthat hna thawh lai hi chawlh lailawk niin VC dinglai te pawh an term pawhsei sak a ni a, tunah hian VC term dinglai hi tum hnih (2) pawhsei ni tawhin hemi chhung hian inthlanna neih tumin hmalak zui leh a ni ta a, Electoral Roll siamthat hna kallai pawh chhunzawm a ni leh dawn ta a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn