H&TE Minister hovin College Principal ten zirna kalpui zui zel dan tur an sawiho

Higher & Technical Education Minister, Dr. R.Lalthangliana hovin nimin khan Higher & Technical Education Officers leh Govt. Colleges leh Institutions-a Principal-te chuan Institute of Advanced Study in Education (IASE) Conference Hall-ah Meeting an nei.

He thutkhawm ah hian H&TE Minister, Dr. R. Lalthangliana chuan COVID-19 hripui len lai ni mah se, zirna kal zel dan tur ngaihtuah chu ram tan thil pawimawh tak a nih avangin Social Distancing vawng chunga buatsaih a nih thu a sawi a, “COVID-19 hri leng hian Mizoram zirna huang chhungah danglamna tha tak siam se, rahbi thar min kai tirtu ni zawk se,” tiin College Course pangngai bakah Skill Development Course hi Mizoram College hrang hrangah introduce theih a ni em, Teaching Faculty leh Man Power bakah tuna awmsa building-ah hian class room a awm thei ang em tihte lo ngaihven tur leh hetiang lama ngaihtuahna pawh tun atanga seng turin Meeting a kalkhawm te a sawm a. Skill Development Course te College-ah bul tan theih a nih chuan Aizawl College chauh nilo, District danga College-ah pawh eizawnna nei nghal duh zirlai tam takin admission an zawn a, admission pawh kum zawka kalpui a nih theih a rin thu a sawi a. College tinte tan Decentralization of Power hmangin mahni College Bus Driver hlawh tur leh Hostel Cook rawihna tur te chu sawrkar remtihna in College tinte thuneihna pek dan ngaihtuah a nih tur thu a sawi bawk.

H&TE Minister Dr. R. Lalthangliana chuan Mizoram chu RUSA hmang tangkai ber State kan ni tih pawh sawiin, “India ram pumah RUSA Zirtirtu 200 pawh tlinglo ah Mizoram in 72 a chang a, 69 in an zawm fel tawh a ni,” a ti a. “RUSA-1 leh RUSA-2 kalpui tawh niin, kan thatpui dawn lai takin Sawrkar laipuiin tihtawp a tum a, theihtawp chhuah in Union Ministry-ah Mizoram sawrkarin titawp loh turin ngenna a zuk thlen a, cheng vbc. 9 Mizoram tan a rawn dah hlawl mai a, hei hi Mizoram College hrang hrang tan malsawmna a ni,” a ti a. Hei bakah hian Mizoram Scholarship Board mamawh cheng vbc. 32 chu lockdown hunah a rawn pe tih a sawi a. Mizoram University Southern Campus tur pawh SEDP hnuaia Higher & Technical Education Board Vice Chairman leh Lunglei North Bialtu MLA ni bawk, Dr. Vanlaltanpuia bial chhunga din thei turin hmalak niin, kumin January ni 11 khan Order Copy hmuh a ni, a ti bawk.

He thutkhawm ah hian Govt. College Principal 26 atangin mi 25 an tel a, College Principal te hian Lockdown chhunga zirna an kalpui dan te tarlangin, Zoom app, Whatsapp leh Google Class hmangin Semester khat chhunga zir zawh tur ang angte zir a nih theih nan Online Class lak thin a nih bakah pdf files te pawh inpek a nih thu an sawi a. District thenkhatah chuan Internet Service Provider a that tawkloh avangin leh zirlaiten Smart Phone an neihloh avangin Online Class lak a harsatna thu te an sawi bawk.