State pawn-a tangkhang 13,111 rawn haw tawh; Vairengte kaltlangin mi 4337 rawn kir

COVID-19 hri leng avanga Mizoram pawn-a Mizoram mi leh sa tangkhang rawn haw chu mi 13,111 an tling tawh nia hriat niin Vairengte kaltlanga rawn haw mi 4337 chhinchhiah an ni a. Mizoram mi leh sa tangkhang rawn haw tur hi mi sang khat chuang hret vel la awm tura ngaih a ni.

Mizoram pawn lama Mizoram mi leh sa tangkhang te buaipui tura sawrkar in a din, Task Group on Migrant Workers & Stranded Travellers chhinchhiahna atanga a lan danin tun thlengin Mizoram mi leh sa tangkhang te hi State/ram dang atangin mi 13,111 chu Mizoram-ah an lo haw tawh a, tun dinhmunah lo la haw tur hi mi 1290 vel an la awm a, heng zinga thenkhat hi kawng laka thang mek an ni a, thenkhat chu hna thil avang leh zirna avanga lo la haw thei lo te an nih avangin a zeuh zeuha lo haw tih loh chu buaipui lutuk tur an awm tawh lo a ni.

Mizoram-a rawn haw tam ber te hi Rel hmanga rawn haw an ni a, Rel hmanga rawn haw hi June 9, 2020 thleng khan mi 6,621 chhinchhiah an ni a, heng bakah hian Vairengte kaltlanga rawn haw chu Zirtawpni thleng khan mi 4337 tling tawhin State pawn-a Mizoram mi leh sa tangkhang, Vairengte Screening Point paltlanga rawn haw te hi February ni 11, 2020 atang khan mumal taka chhinchhiah an ni a, heng rawn haw zingah hian Aizawl District mi tam berin mi 1996 an rawn haw tawh a, Siaha District in dawtin mi 543 an rawn haw tawh a, Lawngtlai District mi 519 an rawn haw tawh bawk. Heng bakah hian Lunglei District mi 353, Kolasib District mi 285, Mamit District mi 151, Champhai District mi 144, Serchhip District mi 143, Khawzawl District mi 74, Saitual District mi 73 leh Hnahthial District mi 56 an rawn haw tawh bawk a ni. Hetihlai hian February ni 11 atanga Zirtawpni zan thleng khan Vairengte Screening Point paltlanga lirthei rawn lut chhinchhiah zat chu 40,429 niin mihring rawn lut chhinchhiah zat pawh 86,659 a tling bawk a, heng zingah hian bungraw phur engemaw zat a tel bawk a ni.

Task Group on Migrant Workers & Stranded Travellers chhinchhiah danin mimal-a lo haw tiam lovin Mizoram lo haw hi trip 370 an awm tawh a, India ramchhung atang chuan a zeuh zeuhin an lo haw tawh dawn a. India ram pawna Mizo tangkhang zingah Vawiin, July ni 13, 2020 hian Singapore atangin hnathawka awm mi engemaw zat chu Delhi an lo thlen beisei a ni a. A bak a hlawma awm deuh UAE leh Kuwait vela mi chu an chungchang Mizoram sawrkarin Union Home Ministry-ah a thlen tawh a, mahse sawrkar laipui (Ministry of External Affairs) in ruahmanna a siam phawt a ngai nia thudawn a ni.

Hetihlai hian State pawnlam mi, Mizoram-a tangkhang te pawhin Mizoram an chhuah-san fel thawkhat tawh bawk a, Zirtawpni thleng khan Mizoram atanga haw chhinchhiah chu mi 2838 an tling tawh a, Inrinni khan Assam-a haw tur mi 14 te thawn haw leh tum niin Myanmar a haw tum mi 48 an la awm bawk a ni. Mizoram atanga haw zing-ah hian Jharkhand State a haw tam berin mi 1451 an haw nia chhinchhiah a ni a, heng mite hi Mizoram hmun hrang hranga hnathawka awm te an ni a. Jharkhand mi leh sa haw te hian Mizoram lo let leh duhin phalna erawh pek an ni rihlo thung.