Mizoram lirnghing chungchang Chief Minister in Union Minister of Mines hnenah a thlen

Chief Minister, Zoramthanga chuan nimin khan Union Minister of Mines, Pralhad Joshi hnenah tunhnaiah Mizoram khawchhak tlangdung chu lirnghingin vawi tam tak a sawi tawh thu leh heng thil thleng hi uluk leh chiang zawka zir tur mithiam rawn tir turin ziakin a thlen.

Chief Minister chuan June ni 21, 2020 atanga niminpiah thleng khan Mizoram-ah 4.2 Magnitude atanga 5.5 Magnitude inkar lirnghing in vawi 50 chuang in Champhai District chu a nghawr tawh thu leh he lirnghing avang hian building engemaw zat a chhiat tawh thu te, mipui a ti thlabar in, In a mu ngam lova pawn-a mu pawh an awm hial thu Union Minister hnenah hian a thlen a ni.

Chief Minister chuan Union Minister of Mines chu Geological Survey of India atangin Mizoram dinhmun rawn zirchiang tura Expert Seismologist/Geo-physicist te Mizoram rawn tir turin a ngen a. India hmarchhak State te chu lirnghing in a nghawr nat theihna ber Zone (Zone-V) a awm an nih avangin Mizoram khawchhak lamah Earthquake Observation Centre dah belh a nih theih nan hmalak sak turin leh District tin Micro-Seismic Zonation tih a nih theih nan hmalak pui turin a ngen a ni.

Hemi hmalam hian Geology & Mineral Resources leh Geological Survey of India, Mizoram Unit hnuaia Geologist te chuan GSI inkaihhruaina, Standard Operating Procedure zawmin lirnghing chungchang hi zirchianna lo neih tawh a ni.