Cheng nuai 513 seng-a Mat Lui Chawm kai-a Lei dawh chu hman theih tura hawn a ni ta

NEDP sum cheng nuai 513 senga Serchhip Mat Phai, Chawm kai-a Galvanised Bailey Bridge dawh thar chu nimin khan PWD Engineer-in-Chief, Er. K. Lalsawmvela MES chuan a hawng a. He Lei hi Mizoram-a Galvanised Bridge pahnihna leh PWD in Galvanised Bridge an dawh hmasak ber a ni.

Serchhip Zawlpui Mat phai-a leilet leh nul nei ten awlsam zawka lirthei nen Mat lui an kan theihna tura Chawmkai-a Galvanised Bailey Bridge dawh thar hawnna hunah hian PWD Engineer-in-Chief, Er, K. Lalsawmvela chuan PWD chuan khua leh khua inkar ah te, Mizoram leh ramdang leh State dang inrina-ah te Lei an dawh thin thu sawiin, amaherawhchu tun-a hawn tak Mat lui ami hi chu fehna tur a nih thu leh PWD in hetianga fehna tura Lei an dawh hmasak ber a nih thu a sawi a, he Lei dawh tur hian kum 2016 atang khan rawtna alo awm tawh thu sawiin, a hlawhtlinna hmuh ni lawk lo mah se kum 2018-2019 a dawh a ni leh tuna loneitute tana hman theih tura hawn a ni ta chu lawmawm a tih thu a sawi a. Helai Mat phai-a kuthnathawktute tharchhuah chu Mizoram in kan ei nasat thu leh tunhnaia inkharkhip-ah pawh Mizo mipui ten kan chhawr nasat thu sawiin, mi tam takin In leh lo te an din phah avangin Lei tha tak dawh chu an phu tih a sawi bawk.

He Lei dawh thar chu Galvanised a nih thu leh Zinc hmanga kah, tuiek mai lo tur a nih thu pawh sawiin PWD Engineer-in-Chief chuan, kum 20 chhung rawng hnawih thar ngailo tur a ngaih a ni tih a sawi a, amaherawh chu uluk taka enkawl zui erawh a pawimawh thu a sawi a. Lei dawh te chu chim thei a nih thu pawh sawiin, chhan hrang hrang a awm theih thu leh hetianga Lei a chim hian PWD lam demna te a awm thin avangin PWD hotute chuan Mizoram-a Bailey Bridge dawh a nih dawn reng rengin a Supply-tu ten dawh hna pawh thawk tawh se tia thutlukna an siam thu sawiin, hetianga thutlukna an siam hnua an Lei dawh hmasak ber chu tuna hawn tak, Mat lui-a Lei dawh hi a ni tih a sawi bawk.

He Lei hi PWD Enginee-in-Chief hian Ribbon chepchat-a a hawn hnuah a lawmna leh Pathian hnena hlanna inkhawm neih a ni a, he hun hi PWD Chief Engineer (Roads), Er. R. Lalrintluanga chuan kaihruaiin PWD Serchhip Division-a Executive Engineer, C. Lalthlamuani chuan Technical Report pein he Lei dawh chungchang hi a sawifiah a. Agriculture & Horticulture Cooperative Society, Serchhip- President, PC. Siamliana pawhin hetianga Lei tha tak sawrkar in a dawh sak chu an lawm thu leh Lei dawh hna bul tan saktu Chief Minister hlui, Lal Thanhawla leh tuna sawrkar mek chungah lawmthu a sawi a, Sawrkar zawng zawngin loneitute an ngaihsak a ni tih a taka an hmuh thu a sawi bawk.

He huna tarlan a nih danin Lei dawh tur hian August 23, 2018 khan khatihlaia Chief Minister, Lal Thanhawla chuan lungphum phumin August 28, 2018-ah Lei innghahna tur laiin hna thawh tan nghal a ni a. He Lei innghahna tur Zawl-pui lam chu thawh zawh thuai a nih laiin Serchhip lam erawh Tui a put nasat avanga laih theih a nih loh avangin ruahmanna chu thlak leh a ni a, a Lei dawh hna hi Garden Reach Shipbuilders & Engineers Ltd., Kolkata ten thawkin March, 2020 khan zawh hman tum a ni a, amaherawh chu hri leng avanga inkalpawhna te khar a nih hnuah harsatna thleng zuiin April 15, 2020 khan zawh a ni ta chauh a ni.

He Lei hawn tak hi ft. 180-a thui niin ft. 10.9 a zau a ni a, Quintal 20 dawl zo tura ngaih niin Lei chhuat hi Tuipui zawl (Sea Level) atanga tehin meter 381-a sang a ni a, Tui len lai berin Tui hian meter 2 vela chim phaklo tura ngaih niin Lei dawh bakah hian a panna kawng, meter 120-a thui chu PWD te hian an siam bawk a, Lei-ah hian darkar khat-a KM 10 aia chak-a lirthei tlan phal a nih loh thu leh Lei kul hret chu sawrkar phal chin a nih thu tarlan a ni bawk.