Chanchin thar thenkhat :

Department hmalakna thlir

Minister Dr. R. Lalthangliana chan Department 3- Health & Family Welfare, Higher & Technical Education leh Commerce & Industries vil tura Mizoram sawrkarin a ruat, Consultative Committee thutkhawm hmasa ber chu nimin khan SAD Conference Hall-ah neih a ni. He thutkhawm ah hian Dr. R. Lalthangliana chuan Minister te enkawl department hrang hrangte hnathawh leh hmalakna te enpui tura sawrkarin Consultative Committee hi a din thu sawiin, langtlang taka thil kalpui a nih theih nan party hrang hrang aiawh MLA te Committee-ah hian an tel thu leh COVID-19 hripui leng vangin duh angin tuman hma an lak chak theihloh bakah Committee thutkhawm pawh hma takah neih a harsat phah thu a sawi bawk. He hunah hian heng Department pathum te hmalakna te tarlan niin hmalak zel dan turte sawiho a ni bawk.

Lirnghing tuarte tlawh

Tunhnaia DM&R Minister hova thukhawm in an lo rel tawh angin lirnghing in a tihbuai mek Indo-Myanmar ramri dep khaw hrang hranga chhiatna thlengte enfiaha, mipuite hnena zirtirna pe tur DM&R Department hotute leh mithiam te chuan nimin atang khan an hna an thawk tan a, Vawiin hian an chhunzawm leh ang. Hetihlai hian Vawiin vek hian Sawrkar leh MZU mithiamte tangkawp chuan Champhai District mipui lirnghing tuar mangang leh thlabarte tan Psychological Clinic an huaihawt tan dawn a. Team 7 ah inthenin Indo-Myanmar ramri dep khaw 31-a mipuite thlamuan tur leh counselling an mamawhna apianga pe turin hma an la dawn a, nimin khan Aizawl chhuahsanin Champhai District hi an pan a ni.

May thla ah zu man tam

Excise & Narcotics Department chuan May thla chhung khan Rakzu litre 2757 manin Zu bilhlai Tin 7637 an man a, Zu zuar mi 49 an man bakah Dawidim Kg. 14 an man bawk. Hemi hun chhung hian Sapzu (IMFL) pawh um 132 an man a, Zu sakna bel 56 an man bawk.

YMA in tanpuina semchhuak

Lunglei Sub-Hqrs. YMA chuan COVID-19 dona kawnga hmalakna tura CM Relief Fund atanga cheng nuai 4 an hmuh leh mi inphal te sum thawhkhawm chu nimin khan an huamchhunga Group YMA 6 te hnenah an semchhuak a, Khaw-thlangtuipui leh Tuiphai Group-ah Rs. 1,40,000/- ve ve; Thorang Group-ah Rs. 60,000/-, Tuichawng Group-ah Rs. 30,000/-, Chhimtuipui Group-ah Rs. 20,000/- leh S.Vanlaiphai YMA hnenah Rs. 10,000/- an hlan a ni.

Home Secretary in tlawh

Mizoram sawrkar-a Home leh DM&R Secretary, Lalbiaksangi chuan nimin khan Lung-lei tlawhin District Emergency Operation Centre (DEOC) dinhmun a enfiah bakah, District thuneitute leh District Jail thuneitute nen inkawmna hun an hmang a, an mamawh hrang hrangte an lo thlen bawk. Home Secretary hi nizan khan Serchhip-ah riakin Vawiin hian Serchhip DEOC a tlawh bakah District Jail pawh a tlawh nghal bawk ang.

MLA in Ambulance a hlan

West Tuipui bialtu MLA, Nihar Kanti Chakma chuan Tlabung Sub-District Hospital tana a lei Ambulance chu nimin khan a hmangtu turte kutah a hlan. MLA Fund atanga lei Ambulance hlanna puala inkhawm ah Nihar Kanti Chakma chuan a bial mipuite chu an hriselna dinhmun chawikan a ngai tih sawiin, hmanrua leh khawl indaih tawk loh avanga thawktuten harsatna an tawk fo thin chu pawi a tih thu a sawi bawk. Rs. 7,50,000/- senga lei Ambulance-ah hian damlo na zualten an hman theih turin Oxygen a awm nghal a, tun dinhmuna Tlabung Sub-District Hospital-a Ambulance an kawllai chu a that tawk tawh loh avangin tangkai hle tura ngaih a ni.