ZMC-a COVID-19 Testing Laboratory (BSL-3) chu hman theih turin hawn a ni ta

Zoram Medical College (ZMC) Falkawn-a COVID-19 vei leh vei lo endikna khawl, COVID-19 Testing Laboratory (BSL-3) chu nimin atang khan hman tan theih a ni ta.

ZMC-a He COVID-19 vei leh vei lo endikna khawl hi nimin chawhnu khan ZMC-ah Health Minister, Dr. R. Lalthangliana chuan hawng turin ruahmanna siam a ni a, amaherawh chu pungkhawm zawnga thiltih chu thalo zawka ngaih a nih avangin Health Minister hian a Pisa-ah hian mi tlemte hmaah a hawng ta zawk a. Nimin khan enchhinna te neih niin, hman theih nghal tura ngaih a nih thu dawn a ni a. Health Minister chuan tuna Silchar Medical College Laboratory-a Sample 8 thawn mek leh nimin zing-a Sample 3 thawn lehte bak chu ZMC-a Laboratory-ah hian endik ve vek tum a nih tawh thu a sawi a. Assam, a bik Mizoram dep lama COVID-19 vei hmuhchhuah an tam tak avangin Silchar Medical College Laboratory chu hman zui a rem tawh dawn lo niin a sawi bawk.

He hunah hian Health Minister, Dr. R. Lalthangliana chuan COVID-19 vei ni a rinhlelhte Sample lakna tur Test kit indaihlohna a nasat thu sawiin, niminpiah lama Indian Council of Medical Research (ICMR) hotute nena an inbiakna ah Test kit 500 vel chu Dibrugarh atangin Mizorama rawn thlen tur a nih thu a sawi a. Tuna Mizoram mamawhna a san em avangin Silchar Medical College Hospital chuan Test kit 100 tlinglo deuh an pek thu leh nizan hmasa khan ZMC-ah rawn phurh thlen a nih thu a sawi bawk. Minister chuan ZMC-a COVID-19 vei leh vei lo endikna tur khawl a lo puitlin theihna tura phalna petu ICMR thuneitute leh helama mithiam, State sawrkar Health Gepartment a thawkte, Mizoram University, Pachhunga University College, Veterinary College Selesih leh he lam a mithiam dangte hnena lawmthu a sawi bawk a ni.

Kumin March 23-a Health Minister, Dr. R. Lalthangliana Pisa-a Consultation of Covid-19 Detection Meeting chuan ‘Laboratory neih ve dan zawn nise’ ti-a relin lo bawhzuia rem lo ruat turin Health Secretary, H. Lalengmawia kaihhruaina hnuaiah Core Committee chu a din nghal a. Ni 12 chhunga Report thehlut tura tih niin COVID-19 Detection Laboratory hi BSL-3 awmna, FIND and Helixar Solutions ten Falkawn-a Central TB Division Laboratory an siam mek ah din chilh nise tiin helai hmunah hian hna thawh tur atanga zaa 90 chu thawh a ni tawh a, phalna te hmuh a nih hnuah chak taka hmalak zui nghal a ni ta a ni. He Laboratory-ah hian Indian Council of Medical Research (ICMR) in COVID-19 screen-na atana hmanrua (Laboratory Equipments) a duh ang a awm kim vek a, ZMC atangin mi 4 te chuan Silchar Medical College-ah training pawh an zuk nei tawh nghe nghe a ni.