Indian Oil-in PMUY beneficiary-te tan LPG pe dawn

Indian Oil chuan tunlai hrileng vanga ramchhunga harsatna awm mekah Pradhan Mantri Ujjawala Yojana (PMUY) beneficiary-te tan tun thla thum (3) chhungin LPG bur thum (3) a thlawnin a pe dawn.

He thu hi Indian Oil Company chuan puangin, Prime Minister-in a puan tawh angin, PMUY beneficiary-te tan kumin April atanga June hian LPG (domestic) bur thum (3) theuh, thla tin bur khat (1) zel a thlawnin pek an ni dawn a, amaherawhchu hemi la thei turte hi bithliah fel tak siam a ni dawn tih an sawi thung a. Pradhan Mantri Ujjwala Yojana( PMUY) hi Below Poverty Line (BPL) chhungkuaa hmeichhiate tan Gas connection awlsam taka neih theihna tura Sawrkar hmalakna a ni a. he Scheme hamthatna dawng thei tur chuan BPL chhungkua Social Economic Caste Census (SECC) 2011-a inziaklut Aadhar card leh Bank Account nei an ni tur a ni.

Hei bakah hian Oil leh LPG-ah stock an nei tha tawk tih sawiin Indian Oil chuan, mipui chi-ai lo turin an ngen a. Lockdown chhung zawngah pawh tluang taka ram inrelbawlna a kal theih nan leh an customer tinten an mamawh tawk LPG an neih theih nan theihtawpin an beih chhunzawm zel dawn tih an sawi bawk.

Indian Oil hian Oil leh LPG semchhuahna kawng hrang hranga thawktute chu Covid-19 vanga nunphung khaihlak mekah mipui leh sawrkar tana thawka hmatawnga tang an nih angin, hetiang mi, Covid-19 vanga nunna chan an awm palh a nih chuan ex-gratia cheng nuai 5 an pek tur thu an sawi a. An hnuaia hnathawk mi nuai 3 chuang hret te leh an nupui leh fate pahnih (kum 25 an nih thleng) Insurance Policy cheng nuai khat (1) thleng kum khat atan a ngaihtuahsak dawn tih an sawi bawk a. Hetah hian Covid-19 kaihhnawiha damlohna neite pawh a tel a ni, an ti.

Hei bakah hian Oil/LPG phurtu leh thawktu dang tangkhang an awm thulha an tlukluhna turin Petrol Pump thenkhatah Relief Centre siamin, hetiang mi an awm palh chuan Indian Oil hnuaia Petrol Pump hnai berah inhriattirin, anni hian a puih dan kawng an lo zawnpui tur thu an sawi a. State Oil campany dangte nen Covid-19 do nan bika siam - PM-CARES Fund ah cheng vbc. 1031 an chhunglut tih an sawi bawk.